鳳凰山位於大嶼山中部，有兩個山峰，主峰為鳳，高海拔934米，係香港第二高嘅山，大嶼山最高嘅山峰；而副峰為凰，高海拔918米。雖然大帽山係香港最高嘅山峰，但海拔930米以上嘅山頂部分被政府劃爲禁區，所以鳳凰山頂成爲一般遊人喺香港境內可以到達嘅最高點。
呢個假期幾乎日日都行山，行完又行，好似上咗癮咁。今日同龜寶同Annie行鳳凰山，應該話終於行到鳳凰山喇，話說上一次Annie帶我行鳳凰山，點知行咁500米先知道上緊大東山。鳳凰山同大東山都係位於大嶼山，而且由伯公坳起步上兩座山嘅起點淨係相差一條馬路，又難怪呢個唔識分左右嘅傻仔會帶錯路上錯山嘅。我哋沿住鳳凰徑第三段，由伯公坳行至鳳凰山再到昂坪。
今日無藍天白雲，反而灰濛濛一片，乜都睇唔到，喺山上面真係「前不見古人 後不見來者」，前後左右都係霧。話明係香港第二高嘅山，條路梗係唔易行啦，起碼對我黎講一d都唔易，但對佢兩個好似好輕鬆咁。我已經盡力跟㗎喇，如果分開太遠就會見唔到佢哋，佢哋都會停低等吓我嘅，但佢哋等我嘅時候我行緊，到我追到佢哋又繼續行，其實我無抖過囉⋯⋯上咗唔知幾多級樓梯之後，終於上到頂喇，可惜嘅係依然白濛濛一片，但就見到有人對住山下面影相，其實佢影緊乜嘢係我見唔到㗎呢？我淨係見到霧咋。抖咗一陣我哋就落昂坪，突然覺得好彩我哋唔係由昂坪行上黎，唔係我應該會更加崩潰。本來諗住由昂坪行落東涌㗎，但因為纜車維修封咗路，所以我哋就行落石壁水塘，再搭巴士返東涌。
成個行程最辛苦係上鳳凰山，不停上樓梯行到人都癲，本來以為934米會有排上，但呢條都算係high intensity low volume嘅路，所以好快就挨過咗。但可能上山用晒d力，落山落到隻腳係咁震，好彩纜車維修唔洗再落咋。由昂坪行落石壁水塘相對好容易，只係條路好多石仔，用黎練neuromuscular一流。唯一嘅遺憾係上山勁大霧，落山好好天⋯⋯希望下次上山都會咁好天啦！
伯公坳 > 鳳凰山 > 心經簡林 > 昂坪（長度約5.2公里）
難度：★ ★ ★ ★ ☆ 有好多好大級嘅梯級，上落好急
風景：★ ☆ ☆ ☆ ☆ 其實白濛濛一片乜都睇唔到，天氣決定景觀
心經簡林 > 石壁水塘（長度約4.6公里）
難度：★ ☆ ☆ ☆ ☆ 有基本上都係平路，最後有一小段落樓梯
風景：★ ★ ☆ ☆ ☆ 無乜景睇，但有d位睇到附近嘅山景加埋水塘
沒有留言:
張貼留言