【同爸爸嘅第二次】香港島・紫羅蘭山 + 大潭水塘

紫羅蘭山位於香港島大潭郊野公園，高海拔433米。南面為孖崗山，北面為渣甸山，東坡下則係大潭水塘。喺農曆新年前後，山上開滿吊鐘花，有好多遊人會專程上山賞花。

年初五，太陽終於出來喇，好耐無見嘅藍天白雲，呢個先係有朝氣嘅春天吖嘛。趁新年假期未完，我就同咗爸爸同嘉偉上紫羅蘭山，享受一吓同爸爸相處嘅時光。聽講有好多人為咗睇滿山嘅吊鐘花而黎，所以我就上黎睇吓咩花咁巴閉會令咁多人專程上山。我哋由金鐘搭巴士去到黃泥涌水塘公園落車，沿住油站隔離嘅樓梯行上去就係大潭水塘道，繼續行就會見到郊遊地圖資訊牌，即係紫羅蘭山徑嘅入口。雖然無行過呢條路線，但沿途嘅指示牌都好清晰，沿住紫羅蘭山徑一直行，好快就到山頂喇。雖然呢座山個名好優美好女仔，但上山嘅路並唔係想像中咁簡單，不斷上樓梯真心搞到我隻腳崩潰，好彩沿途有樹蔭擋吓太陽，先至輕鬆少少。但山頂個景靚到唔知應該點樣形容，就好似個山名咁靚，就係靚到令人見到會「嘩～」咁樣，上樓梯嘅汗水都算係無白流喇。抖咗一陣就繼續行，先驚覺啱啱嘅風景比起眼前嘅跟本比唔上，原來香港島除咗高樓大廈之外都有咁樣嘅一面。呢度有個小小嘅懸崖，坐喺崖邊睇風景，靜靜地嘆足一個晏就，或者對於繁忙嘅城市人黎講已經好奢侈喇。

本來沿住山徑繼續行會上到孖崗山，但因為時間唔早，所以只好喺中間嘅分岔路沿住引水道去大潭水塘。其實行大潭水塘都唔會好失望，因為大潭水塘都有山有水，唯一遺憾嘅係睇唔到吊鐘花，究竟係佢仲未開花，定係我睇到都認唔到呢？

黃泥涌硤 > 紫羅蘭山 > 引水道 > 大潭水塘道 > 大潭郊野公園南門

（長度約9公里，需時約3小時）

交通：(起點) 由金鐘搭6巴士去黃泥涌水塘公園、

(終點)搭14巴士去西灣河地鐵站
難度：★ ★ ★ ☆ ☆     前半段都係梯級，但後來行引水道同水塘都係平路

風景：★ ★ ★ ☆ ☆     山頂個景好靚，崖邊個景仲靚