釣魚翁高海拔344米，位於西貢清水灣半島，屬於清水灣郊野公園嘅一部分。由山嘅北面望釣魚翁，山峰尖削，係「香港三尖」之一，亦係三尖最易行嗰座。
開學之後一直都好忙，因為d時間都用晒黎做FYP，但我唔想最後一個學期淨係對住d功課同考試，我會盡量抽時間做自己想做嘅事。好多朋友仔都話我唔似讀緊final year，勁得閑去打波去玩，我宜家只可以話之前未到戲肉啫。新年假後呢兩個星期，勁多嘢做真係好忙，我知直到畢業之前，我只會愈黎愈忙，我知我可以好好分配時間，喺最後一個學期都可以做我中意做嘅嘢。今日趁有時間天氣又好，我同Annie行咗一直都好想行嘅釣魚翁。
噚晚同龜寶講我哋會行釣魚翁，佢即刻send咗d資料俾我，話有小巴可以去到起點五塊田。但Annie話反正行山都係行，由地鐵站行埋上五塊田都唔怕啦，點知由地鐵行到五塊田已經行咗1個鐘喇。之後沿住釣魚翁郊遊徑行，一開始上山都甘甘地嘅，一黎就石級，不過諗諗吓行山就係要上山㗎啦，想行平路去行街吖嘛。然後一直都係樓梯，上落不斷，中間有好多分岔路，因為隔離有條越野單車徑。本來以為好快會上到釣魚翁，但原來我哋一早已經miss咗個分岔口，本來諗住喺下一個分岔口兜返上去啦，點知我哋呢兩架林寶堅尼（沿途有班老友記幫我哋改嘅名）行得快過頭又miss咗，當我哋見到山頂嘅時候發現已經離開咗好遠。既然我哋嘅目的地係釣魚翁，梗係要行返轉頭啦，明明落樓梯嘅時候先講好彩唔係喺嗰邊行上黎咋⋯⋯
第一次行三尖，發現原來我係黎爬山唔係黎行山㗎，但上到山頂真係好靚，其實我次次上到頂都話靚，但今次係360度都係靚景，完全無俾樹遮住，真係好正。落咗山之後繼續沿著山徑行去下田山，沿途風景好靚，一直圍住清水灣黎行，上到下田山又係另一種靚，雖然無釣魚翁咁高，無360度嘅景，但係我第一次見到山頂嘅高爾夫球場，係我第一次見到漁排。中間同Annie講咗好多心底話，每個人都有自己嘅過去，好多事我一直都收收埋埋唔想俾人知，但我覺得講咗出黎舒服咗好多；而佢都同我講咗好多佢嘅事，發現原來我未夠了解佢。最後行到落大坳門路，完成咗今次嘅旅程，之後又急急腳返學校收data喇，然後發現原來無車出去㗎，好彩咁啱有的士咋，唔係就要行勁遠去巴士站喇。
今日瀨咗嘢嘅同時都學咗好多嘢，第一係既然有車去起點就唔好浪費時間行過去，有時間就留返喺山頂睇風景啦。第二，未去過就做好功課先上山，唔熟就唔好開林寶堅尼咁，唔係行過咗都唔知。第三，俗語話上山容易落山難，爬到上石唔一定會落到黎㗎，下次都係唔同Annie癲，不過喺舊石上面乜都睇晒係靚嘅。最後，唔理之前行過嘅山幾容易，都要帶野食上山，我哋遲咗兩個幾鐘落山，乜野食都無帶連粒糖都無，餓到個肚扁咗，做咩都唔可以好餓親自己！
五塊田 > 釣魚翁 > 下田山 > 大坳門路（長度約6.3公里，需時約4小時）
交通：(起點) 將軍澳地鐵站A出口、(終點)的士
難度：★ ★ ★ ☆ ☆ 有好多梯級，但唔係好大級嘅，而且上山又要爬
風景：★ ★ ★ ★ ☆ 山頂有360度嘅靚景，沿途又圍住清水灣
