獅子山應該係最為人熟悉嘅山峰，高海拔495米，位於九龍同沙田之間，屬九龍群山之一。
早幾日上咗龍脊，宜家上咗癮啊，又心思思想行山喇。上一次行龍脊有d簡單，幾乎汗都無出，所以今日要行難少少嘅山，真係少少。始終都好驚行完會膝頭哥痛，所以揀咗一條長度比較短嘅路線。今日係大年初一，天氣唔太好，落住毛毛雨，山上又勁大霧，認真唔係一個行山嘅好日子。但難得同龜寶一齊行山，就算天氣再差，都係會行嘅。由黃大仙地鐵站沿住沙田坳道上斜，就到麥理浩徑第五段嘅起點。原本以為年初一會好少人行山，而且天氣唔好應該會無乜人行山啦，點知山上面係出乎預料咁多人！沿住漫長梯級慢慢行上山頂，先發現由高處俯瞰成個九龍半島係幾咁唔一樣，原來呢個熟悉嘅地方係好靚好壯觀㗎，唔怪得呢個獅子山頂會逼滿晒人啦。喺山頂逗留咗一陣，睇飽睇夠先沿住麥理浩徑行去回歸亭，再喺分岔路沿住山徑落獅子山公園，完成咗第一次同龜寶行山嘅行程。
成程行咗2個半鐘，由黃大仙地鐵站行到獅子山公園，雖然路線長度比較短，但因為上落山幅度比較大，而且又有勁多樓梯，所以行起上黎就辛苦少少啦。開始之前，我一直好擔心龜寶會嫌我行得慢，因為我係烏龜，行得再快仍然係烏龜。以前同爸爸行嘅時候，我都唔知抖咗幾多次，淨係上頂個段路都要抖起碼3次，但今日就無乜點抖，因為要行快d，唔係下次龜寶唔同我行㗎。沿途就算行到好攰都唔敢出聲，因為知道龜寶已經行得好慢好慢好慢黎就我㗎喇。好彩龜寶無覺得我行得慢，而且膝頭哥都乖乖無痛，實在太好喇！
沙田坳道 > 獅子山 > 獅子山公園（長度約5.3公里，需時約2.5小時）
交通：(起點) 黃大仙地鐵站B2出口、(終點)搭2F巴士去石硤尾
難度：★ ★ ★ ☆ ☆ 有勁多梯級，但都唔係好大級嘅
風景：★ ★ ☆ ☆ ☆ 好大霧，又唔係完全睇唔到，但天氣好d會再靚d
沒有留言:
張貼留言