【最熱門行山路線】香港島・龍脊

龍脊位於香港島，因其山脊好似飛龍般高低起伏，而得名。而且沿途風景優美，曾被譽為「亞洲最美市區行山徑」。

唔記得咗有幾耐無行山，因為每一次行完都膝頭哥痛，仲要痛成個星期，嚇到我都唔敢行山喇。但我又要行又要驚，所以我揀咗一條比較易行嘅路線。今日天朗氣清，我同Annie一齊由筲箕灣搭去石澳嘅小巴喺土地灣起步，沿住港島徑第八段拾級而上，行上打爛埕頂山同雲枕山。雖然呢段路高低起伏比較大，但沿途兩面海灣風景真係好靚，可以睇到石澳同大浪灣，又可以睇到大潭港。就算路徑頗為崎嶇，可以睇到呢個景，辛苦少少都值得啦！而且沿途嘅指示牌好清晰，唔怪得吸引到咁多登山客同外國遊客上黎啦。最後繼續沿住港島徑第八段落大浪灣，完成咗今次輕輕鬆鬆嘅旅程，我哋仲沿住馬路行去石澳食串燒添，要補充返消耗咗嘅體力喔，哈哈！由土地灣行到大浪灣，我哋花咗大約3個鐘，所以我叫烏龜係啱㗎。

仲未開始個陣我覺得想睇風景一定會好辛苦，仲特登預備咗1升水同兩個面包。但原來龍脊係一條非常超級勁輕鬆嘅路線，除咗一開始有d梯級，有少少辛苦之外，後面都係平路喇。因為沿途無補給，所以我哋預備充足先上山，但又好似太充足喇。經過呢一次，發現路徑橫切面圖係好有幫助㗎，可以好清楚睇到路徑嘅起伏，喺行山之前就可以有充足嘅預備同心理準備啦。重點係膝頭哥無痛嚕～

土地灣 > 龍脊 > 大浪灣 > 石澳（長度約10.5公里，需時約3.5小時）

交通：(起點) 由筲箕灣搭小巴去土地灣、(終點) 搭小巴去筲箕灣

難度：★ ☆ ☆ ☆ ☆     一開始有d梯級，但後面就全平路，一d難度都無

風景：★ ★ ★ ☆ ☆     左右都有靚景，正！