魔鬼山，又名炮台山，標高222米，位於九龍油塘。喺幾百年前，魔鬼山上嘅「魔鬼」其實係當時嘅海盜，後來之所以叫炮台山，因為呢度變成政府嘅軍事據點。宜家山上面無魔鬼，反而充滿住歷史足跡，荒廢咗嘅炮台、頹垣敗瓦嘅碉堡係必到景點。
年初二天氣都唔係咁好，出門嘅時候仲見到藍天，但準備起行就落雨，本來plan咗行釣魚翁，但因爲落雨要改行程喇，最後行咗魔鬼山。其實應該取消嘅，但我同Annie都好想行，無計啦，邊個叫我哋咁貪玩咩，唯有行d相對安全少少嘅山啦。我哋由油塘地鐵站行上碧雲道高俊苑，旁邊有條樓梯，沿住樓梯行上去就到衛奕信徑第三段，喺分岔口轉右一直行就上到山頂喇。好彩行嘅時候唔算好大雨，所以都輕鬆少少唔洗開遮，著件防水褸就得喇。一開始都係樓梯多，不過都唔難行嘅，類似係山坡維修嗰d樓梯咁。之後上到衛奕信徑就平路多，中間會見到墳場同好靚嘅海，但我唔敢影相啊，因為見到海嘅地方都會見到墳場⋯⋯我都知我細膽㗎喇，天氣唔好又大風，成日自己嚇自己，太好想像力，沿途捉實Annie隻手唔放，好彩條路夠寬可以兩個人一齊過咋。
上到頂係一個砲台黎嘅，細膽嘅我唔敢亂走啊，淨係喺d開揚嘅地方度玩咋，相反Annie就中意捐黎捐去搵新野玩。我估好天嘅時候個景應該係好靚嘅，雖然魔鬼山唔算好高，但都有海景睇吖。不過今日咩都睇唔到，唔知Annie影乜呢？勁大霧又大風，所以我哋都係留咗一陣就落山喇。Annie話雖然好大霧咩都睇唔到，但可以霧裏看蓮花喎，我就咩都睇唔到，白濛濛一片，真係頂佢唔順啊。落山嘅時候見到有分岔路直接落高超道，但落雨加上天黑，而且我哋又唔熟路，都係原路折返最安全。希望下次好天嘅時候再上黎啦，應該會好靚㗎～
油塘地鐵站 > 碧雲道 > 衛奕信徑第三段 > 魔鬼山 > 油塘地鐵站
（長度約5公里）
難度：★ ☆ ☆ ☆ ☆ 全條路都係細級嘅樓梯同平路，算係好輕鬆嘅
風景：★ ☆ ☆ ☆ ☆ 好大霧，大霧到咩都睇唔到，好天應該會靚d
