【新春上山行大運】新界中・針山

針山，高海拔532米，位於新界中部，係沙田區同荃灣區嘅分界。佢嘅主要特徵係個好尖嘅頂峰，聽個名就知好尖，好似針咁尖！

新年有咩做？梗係行山啦！今日同龜寶上針山，一開始我以爲針山好難，對我黎講係一個遙不可及嘅山，因為成日聽人講針草帽乜乜乜乜，毅行呢段好甘好多樓梯啊之類。我咁耐無行，諗都無諗過我竟然上到去又落得返黎！

我哋由城門水塘開始，經過主霸再沿住麥理浩徑第七段上針山。我都唔知行咗幾多樓梯，我淨係知唔停得，龜寶已經行得好慢就我喇，不斷上啊落啊，樓梯樓梯同樓梯啊，點解唔係一直上就到呢？行咗勁耐，終於都到喇！上到頂係靚嘅，360度靚景任睇，一邊望到沙田，另一邊又有水塘！上到頂當然要影相啦，而我又奇蹟地坐到上支標高柱度，真係好有成功感！行得咁攰，梗係要食野啦，我帶咗自己整嘅朱古力曲奇上山，雖然整得好甜又好痴牙，龜寶都食咗好多塊啊！龜寶話我哋行得算慢喇，上次佢一個人上去都係用咗35分鐘咋，梗係啦，你帶住隻烏龜，快極有限啦！

 

今日啱啱開始上山無幾耐就遇到蛇喇，好彩係離遠見到佢，而佢都係喺樓梯路過啫，龜寶問我仲行唔行，蛇邊度有㗎啦，行嘅時候小心d就得喇。爸爸曾經講過有水嘅地方就會有蛇有老鼠，我估水塘附近有蛇都係好正常事嘅。

城門道 > 主壩 > 麥理浩徑第七段 > 針山 > 城門道

（長度約7.5公里，需時約2.5小時）

交通：(起點) 由荃灣搭小巴82號、(終點)小巴82號往荃灣

難度：★ ★ ★ ☆ ☆     係好多樓梯，但距離唔算好長，還可以啦！

風景：★ ★ ★ ☆ ☆     好天氣又有靚景，辛苦行上去係值得嘅！