飛鵝山位於九龍東北部，高海拔603米，係九龍區最高嘅山。其南脊有好多懸崖峭壁，鸚鵡咀石同自殺崖都喺呢邊，係非常有難度嘅路線。
上次行完山之後日日都落雨，想行吓山都唔得。當好天嘅時候，我已經要開始返工，無乜時間可以行山喇，突然發覺得原來可以連續行三日山係好奢侈，都唔知下次行山係幾時⋯⋯今日趁放假，又好天，就同龜寶行咗飛鵝山。上次行飛鵝山揀咗最容易嘅路線，而今次我哋揀咗條容易嘅上山，同好有挑戰性嘅落山。
我哋由黃大仙出發經沙田坳道行去飛鵝山觀景台，但淨係行馬路又好悶嘅，所以我哋行咗上慈雲山再落返沙田坳道。其實慈雲山無乜特別，係樓梯特別特別細級啫，山頂個景好靚好清，連港島d山都睇得好清楚。雖然好多樓梯，辛苦過行馬路，但有靚景睇，都好過行馬路嘅！之後我哋由東山象山行去飛鵝山，其實都唔係好長，好快就到目的地喇。不過中途好多密林，係睇唔到自己隻腳咁密，我都kick親好多次，成日都kick到樹滕，而且早幾日落雨d路濕晒，唔係泥漿路就勁跣。不過山頂好靚，天氣好真係好靚，一邊睇晒成個九龍，另一邊又睇到西貢，喺停機坪食住手指餅曬太陽好舒服！
今次我哋無行樓梯嗰條路落山，反而行咗亂石陣，上網睇返原來呢邊係南脊，係咁多條路最難行嗰條，我都係卜咗兩次啫，無跌死ok啦！好期待下次行山啊！要我放假同時要好天仲要有人陪先有得行⋯⋯唔知下次係幾時呢？
黃大仙地鐵站 > 沙田坳道 > 慈雲山 > 沙田坳道 > 東山 > 象山 > 飛鵝山 > 清水灣道（長度約7.5公里，需時約4.5小時）
交通：(起點) 黃大仙E出口、(終點) 搭92巴士去彩虹
難度：★ ★ ★ ★ ☆ 上山都係馬路同樓梯ok嘅，但落山真係要好小心
風景：★ ★ ★ ☆ ☆ 今日天氣好好，個景好靚！
沒有留言:
張貼留言