太平山，位於香港島西部，高海拔552米，係香港島最高嘅山峰。山上景觀開揚，可以俯覽維多利亞港兩岸絕佳景色，所以呢度被發展為香港最重要嘅旅遊景點。
做咗上班族之後，一個星期有六日都喺公司，可以行山嘅時間唔多，而且唔知點解逢星期日都落雨⋯⋯「唔通連個天都唔中意我？唔緊要啦，聽日再行過啦，聽日要返工啊！」所以今晚放工之後約咗爸爸行山睇夜景，其實夜晚行山都唔會好危險嘅，睇吓行邊度啦！
今晚我哋上咗山頂行咗個圈，由盧吉道開始行到夏力道，其實似係行一個比較大嘅公園咁，可以當係飯後散步，唔似行山咁辛苦。沿途都有唔少遊人專門去欣賞夜景，而且仲有跑手練跑添。前段會比較多景睇，香港嘅夜景好靚，而且今晚就好似d明信片咁靚！不過段路唔係全段都有燈，某d路段好黑，伸手不見五指咁黑，所以都係要準備定電筒。行到中後段嘅時候，爸爸突然醒起廿年前帶我行過，仲話我細細個都行得晒成程，唔洗人抱好勁㗎，今日到我帶返爸爸黎行喇！
今晚真係好舒服，夜晚涼涼地一d都唔熱。最大嘅發現係行山頂最難唔係行嗰段路，而係上落山嘅時候。本來諗住搭巴士上山嘅，點知上錯車去咗纜車站，但排纜車起碼要排一個鐘，所以最後我哋搭的士上山。行完落山嘅時候，啱啱都係d遊客走嘅時候，我哋排咗成個鐘等咗四架小巴先落到山！
盧吉道 > 夏力道 （長度約3.5公里，需時約1.5小時）
交通：(起點) 搭的士上山頂、(終點) 搭1號小巴落中環地鐵站
難度：★ ☆ ☆ ☆ ☆ 好似行公園咁，全部平路，輕鬆
風景：★ ★ ★ ☆ ☆ 香港夜景真係好靚，同明信片一樣咗靚
