【兜咗個大圈落山】西貢・黃牛山 + 水牛山

黃牛山及水牛山位於西貢區，分別高海拔604米及606米，係馬鞍山郊野公園嘅一部分。喺山頂視野廣闊，可以瞭望馬鞍山、俯瞰沙田區和西貢海。喺黃牛山頂下嘅黃牛石城，有一個好特別嘅石，叫石天窗，聽聞好難搵，但好靚好壯觀！

今日嘅行程其實係大半年前已經計劃好，但到今日先可以行到⋯⋯早排日日都落雨，好彩今日好好天，而且間中仲有藍天白雲添！龜寶話雖然今日無落雨，但之前落咗咁多日雨，某d路段會好跣，特別係由黃牛山落石天窗嗰段，所以我哋由石天窗行返上黃牛山，雖然同網上嘅路線有d唔同，但跟住龜寶唔會有事嘅。

我哋由黃泥頭巴士總站開始，沿住石牙背嘅山徑接上麥理浩徑第四段，喺分岔口轉上石天窗再上黃牛山。石天窗之前嘅路係寬闊嘅石梯或者斜路，而且一直都係樹陰下，係比較輕鬆嘅。但上石天窗嗰段甘到不行不行了，唔單止超級斜，240米嘅路程要上160幾米高，而且仲要係泥石路，好跣，要手腳並用，但都唔知要捉邊度踩邊度。龜寶怕我跣腳跌落去，所以行我後面，但我成日急停，搞到佢唔知行邊好⋯⋯哈哈，我唔係有心整蠱佢㗎。行咗一陣，終於見到黃牛石城喺遙遠的那方，我哋繼續好努力咁爬上去。過咗好斜有繩捉嘅一段，終於到咗石天窗喇，可能我太興奮嘅關係，最後一步我俾條繼戟親趴低咗，好彩無事，污糟晒啫。唔係自己親身去過，都唔知石天窗原來係咁大咁宏偉，企咗入去忽然覺得其實自己好渺小。影完相之後我哋又繼續上路喇，上山頂呢段反而無咁斜咁難行，由巴士站到頂，行咗2個鐘，終於搞掂喇！今日天氣好好，景觀好清好遼闊，可以清楚望到釣魚翁、馬𩣑山，又望到蚺蛇尖，真係好靚，置身於大自然之中好舒服，特別係辛苦完之後對住個無敵大靚景嘅時候！

上到頂之後就梗係落山啦，其實有好多條路線可以選擇，包括原路折返。最後我哋揀咗繼續沿路行落黃泥頭，好似兜個圈咁。點知原來個圈要兜到無敵咁遠，要經過石芽山山腰，而且條路唔係密林，就係超斜嘅泥石路，落得好辛苦！仲要有大量嘅蜘蛛網，都唔知係繼續行好，定調頭走好⋯⋯總之就係，有驚無險完成咗今次嘅旅程啦！

黃泥頭巴士總站 > 石天窗 > 黃牛山 > 水牛山 > 花心坑 > 黃泥頭巴士總站

（長度約7.5公里，需時約3.5小時）

交通：(起點) 搭巴士86號去黃泥頭巴士總站

難度：★ ★ ★ ★ ☆     上山路途又跣又斜，要隔外小心！

風景：★ ★ ★ ★ ☆     天窗石好宏偉，山下風景好靚！

【無諗過會咁難行】 香港島・柏架山

柏架山位於香港島東區，高532米，係香港島第二高嘅山，喺山上面可以飽覽港島及九龍東部的景色。由山嘅北脊上山，仲可以一訪將軍石。

今日第一次同嘉彤同Long行山，當然唔少得仲有Annie啦！行之前Long仲問緊點算，四個路痴上山會唔會死㗎，仲話好想過今年嘅聖誕節，唔想咁早死。唔怕啦有Annie喺度，專業㗎嘛，搵路、開路、爬石、做人肉扶手、仲有盪失路，各方面都非常有經驗㗎！

今日我哋行柏架山，跟據網上嘅講法，我哋要由耀東邨開始，搵一條有綁繩索嘅樓梯行上護土牆，但原來一開始係要行維修用嘅鐵梯，上多幾條先會見到綁有繩索嘅樓梯⋯⋯沿途都係樹陰下嘅小徑，開始都唔算密同幾容易行嘅，但過咗將軍石之後可以話係密林咁密，而且要不斷上，短短400米嘅路程就要向上爬升200幾米，可想而知有幾斜，噚日仲要落過雨，樹陰下嘅路仲係濕嘅， 又跣又斜，感覺行極都行唔完咁。不過喺將軍石嘅風景係好靚嘅，望晒成個港島東，有一種居高臨下嘅感覺。上將軍石途中要經過一條超超超窄嘅路，係兩舊大石中間嘅罅隙，肥少少都會卡住！今次Annie當然有爬上舊石度啦，Long都上咗，我同嘉彤都有嘗試㗎，但唔成功，我上到一大半㗎喇，但我就係怕。爬將軍石仲難過犀牛石，犀牛石都叫有條木梯爬再扶住棵樹爬上去吖，將軍石係要搵人托上去再捉實條繩，游繩咁上，側邊無任何野可以借力，而且地下係舊細少少嘅石，唔平仲要有坑添。

由於大家都驚天黑都未落到山，而且又要繼續行密林， 我哋最後無上山頂，過咗咗密林上到柏架山道就沿路落山喇，唯有下次再挑戰啦，最遠嘅距離係望到終點個氣象波波，但要調頭離去。今日嘅感覺係好攰，好後悔淨係睇行程嘅長短，但無睇上山嘅斜度；好後悔行山之前做咗gym仲要無食晏，雖然未攰到行唔郁，但有玩命嘅感覺。

耀東邨 > 將軍石 > 柏架山道 > 大風坳 > 鰂魚涌 

（長度約5.5公里，需時約3小時）

交通：(起點) 筲箕灣地鐵站A3出口、(終點)鰂魚涌地鐵站

難度：★ ★ ★ ★ ☆     雖然短程途，但又跣又斜

風景：★ ★ ★ ☆ ☆     將軍石好壯觀，山下風景好靚！

【搵位泊車最辛苦】 西貢・大嶺峒

大嶺峒位於清水灣半島，係清水灣半島東面唯一座山峰，所以係山頂可以見到一望無際嘅牛尾海同大小島嶼嘅迷人景色。

噚日同Annie行山，今日輪到同龜寶行，其實我哋都係早一日先決定行邊，點都好過即興諗嘅。龜寶話行邊都無所謂，但以龜寶嘅一貫作風，就係唔可以行d太危險嘅山，路程太長或者無退路嘅都唔可以，佢係擔心我應付唔到，其實有d低估咗我囉，我係行得慢過隻龜，但我慢慢行係行得晒全程㗎⋯⋯最後我哋行大嶺峒，上網睇話3個鐘搞掂，龜寶話我哋應該2個鐘行完啦，睇吓點⋯⋯提提你，你帶住隻烏龜喔！

本來係要由鑽石山搭巴士入大坳門嘅，但龜寶話揸車入去，好吖，我可以放低晒d野先行山，減輕負重。但假日嘅停車場都係爆晒，起點隔離個停車場滿咗，遠少少嘅停車場都滿咗，最後我哋泊咗係離起點1公里嘅清水灣二灘停車場，仲要係限時2個鐘嘅錶位，2個鐘之後我應該仲喺山上面喎。

我哋用咗半個鐘先由停車場行到去起點，再食少少魚蛋燒賣就起行喇。沿住龍蝦灣郊遊徑行，一開始全部都係樓梯，我睇見都怕怕，呢d天梯好似行極都行唔完咁，龜寶仲話上山應該全部都係呢d樓梯，唔係掛⋯⋯我已經攰喇，龜寶話去到平路先抖，但平路呢？想chur爆我咩？好唔容易先上到山頂，心情好興奮，因為唔洗再上山喇！其實路程唔算好長嘅，但就係急上無得停囉。今日天氣咁好，又有藍天白雲，景色當然靚啦，唔行山放鬆一吓真係嘥晒。除咗影相之外，當然唔少得野餐啦，我d朱古力餅係用黎獎勵自己㗎咋，啱啱先食完燒賣邊有咁快餓，都未消化啦。

抖夠之後就開始落山喇，我好慶幸我哋由大坑墩起步，而唔係由馬術學校開始，上山嘅路會長好多！落山沿途嘅風景都好靚，雖然唔及山頂咁開揚，但行得愈低就會見到「綠帽子」，好得意好神奇。行到落地面諗住終於行完，我諗多咁喇，我哋仲要行返去攞車啊！好彩行行吓有的士咋⋯⋯

大坳門停車場(近淺水灣二灘) > 大坑墩 > 大嶺峒 > 龍蝦灣郊遊徑 > 龍蝦灣路 （長度約6公里，需時約2.5小時）

難度：★ ★ ☆ ☆ ☆     雖然多樓梯，但唔算長

風景：★ ★ ★ ☆ ☆     好靚嘅牛尾海，天氣好景觀清晰！

【赤柱即興冒險記】香港島・斜炮頂

炮頂位於赤柱半島南部，高177米。東面嘅山坡上有好多不同造型嘅風化石，其中犀牛石最為人熟悉。由於呢舊風化石嘅形態好似犀牛，不論外形同皮膚嘅紋理都好相似，因而得名。

難得嘅週末假期，我又約咗Annie行山，好似除咗行山之外都無乜好做，行街睇戲唔啱我哋，究竟我哋係唔係女仔黎？由於星期六Annie要返工放點半，所以我哋預咗行條短少少嘅，但我哋今次都世界級喇，計劃嘅行程同真係行嘅路線係完全唔同！我哋原本計劃行渣甸山，去到巴士站都未諗好要行邊，繼續行渣甸山？不如行紫蘿蘭山，有d長喎；咁短短地行西高山，睇埋日落天黑先落到山喎。最後係巴士站見到有架車去赤柱，我哋就決定去斜炮頂睇犀牛石！

我哋落車先發現架巴士總站喺赤柱廣場，原來唔入到起點嘅，唯有轉搭的士入去啦，因為行入去都成2km，以我嘅速度日落都未上到山頂啊。起點係軍營隔離一條小山路，上網有好多網站都叮囑過千祈唔好喺軍營附近影相，所以我哋都好小心安靜咁行過。可能早排打過風，條路有冧樹又陰森，其實都幾得人驚。沿住樓梯上，眨吓眼就到高程點，真係好快，我估行咗15分鐘都無。高程點旁邊有條小路去睇風化石，一開始係落斜嘅沙路有少少跣，Annie話腳尖指向側面咁行會容易d落，但我都係覺得好跣，之後佢發現我好似企鵝咁兩隻腳外八細細步咁行，但佢係想我側身橫拼步咁落，其實係佢講得唔好定係我聽唔明？

之後我哋一直搵好出名嘅犀牛石，但真係好難搵，地圖又無寫係邊，又無路行。Annie一直帶我跟絲帶路，原來要行到比想像中遠好多低好多，中間仲要經過d巨型石陣，條路勁窄肥少少都過唔到。終於去到犀牛石，但原來先係旅程嘅開始！要爬上去一d都唔容易，係堅堅堅難。已經有人好好心放咗條梯喺石底又綁咗幾條繩喺樹度，爬上條梯之後要拉住棵樹同d繩借力爬上石，但舊石無乜罅好難踩實比力上，都係Annie喺上面拉我上去。拉到一半我兩隻腳都掂唔實舊石，一手拉實Annie一手扶實舊石，好驚跌落去，最後我撻沙魚咁趴係舊石度慢慢上去，最慘係風化石好利好𠝹手，一唔小心就𠝹損晒。咁難先上到去，落都唔會輕鬆幾多，今次我又係踩住Annie落，佢叫我千祈千祈唔好再坐喺佢個頭度喇！

除咗風化石之外，呢度個無敵大海景好正，但隔離原來係赤柱監獄，形成好強烈嘅對比。總之今次又係有驚無險，安全返歸。本來無諗過爬石，無帶手套又無著長袖衫；無諗過太陽落山先開始回程，無帶電筒，淨係靠手機閃光燈。不過同Annie行山應該預咗係咁驚險嘅⋯⋯

黃麻角道 > 斜炮頂 > 犀牛石 > 斜炮頂 > 黃麻角道

（長度約1.5公里，需時約2小時）

交通：(起點) 由交易廣場搭巴士260號去赤柱轉的士、

(終點)搭14巴士去西灣河地鐵站

難度：★ ★ ☆ ☆ ☆     又唔係好難，只係落斜有好多碎沙石，要好小心

風景：★ ★ ★ ☆ ☆     風化石原來好特別好靚！

【放假就係行山日】香港島・渣甸山 + 畢拿山

渣甸山同畢拿山，分別高海拔433米同海拔436米，位於港島中至東部。喺山上面除咗可以俯瞰港島北部同九龍半島之外，仲可以遠眺大潭水塘嘅美景。

上一次行山係幾時？究竟幾耐無行山？我都唔太清楚，應該真係好耐喇。咁啱國慶假期有dayoff就梗係要行山啦， 所以我同爸爸嘉偉龜寶行渣甸山同畢拿山。 起點同上次行紫羅蘭山一樣都係陽明山莊，搭車經過香港網球中心，當下有一絲絲嘅懷念，總覺得老喇，想當年成日會去呢度比賽。一開始就要沿住大潭水塘道上斜，我會形容呢段係最辛苦又無趣嘅熱身路段，未上山已經行到好攰，好彩有親愛嘅嘉偉幫我揹背囊，我可以舒服少少。之後沿住港島徑第五段嘅樓梯慢慢上山，好快就到渣甸山，之後仲第一次見到石礦場又見到水塘，遠睇其實都好靚㗎，日日都困喺石屎森林，呢d風景真係好少見。之後用餘下嘅力爬埋上畢拿山，抖咗一陣就落大風坳，沿柏架山道返鰂魚涌，最後段路全部都係落斜嘅馬路，其實都唔算辛苦嘅，係咁耐無行，上山有少少吃力啦。臨到終點嘅時候見到一座舊式建築，好似係乜乜樹木研習中心之類，我覺得好靚叫龜寶幫我影，最後佢淨係影我，無影座建築囉，唔該晒！

出發之前，爸爸話我著長tight會俾樹枝勾爛條褲喎，我就話勾爛條褲好過刮損隻腳吖，結果係無勾爛褲都無刮損腳，幾好唔錯。不過我就真係烏龜咗d，上網睇人哋預兩個鐘至兩個半鐘就行完，我用咗三個半鐘，未double算係咁啦！其實難得放假，我都想行d難少少唔太hea嘅山，但龜寶話咁耐無行都係行d容易嘅，唔緊要啦，有得行好過無！

黃泥涌峽 > 陽明山莊 > 渣甸山 > 畢拿山 > 大風坳 > 鰂魚涌

（長度約6.5公里，需時約3.5小時）

交通：(起點) 由金鐘搭6巴士去黃泥涌水塘公園、(終點)地鐵

難度：★ ★ ☆ ☆ ☆     係好多樓梯，上完又落又再上，但還可以嘅

風景：★ ★ ★ ☆ ☆     石屎森林中嘅靚景，又有石礦場，值得嘅！

【新春上山行大運】新界中・針山

針山，高海拔532米，位於新界中部，係沙田區同荃灣區嘅分界。佢嘅主要特徵係個好尖嘅頂峰，聽個名就知好尖，好似針咁尖！

新年有咩做？梗係行山啦！今日同龜寶上針山，一開始我以爲針山好難，對我黎講係一個遙不可及嘅山，因為成日聽人講針草帽乜乜乜乜，毅行呢段好甘好多樓梯啊之類。我咁耐無行，諗都無諗過我竟然上到去又落得返黎！

我哋由城門水塘開始，經過主霸再沿住麥理浩徑第七段上針山。我都唔知行咗幾多樓梯，我淨係知唔停得，龜寶已經行得好慢就我喇，不斷上啊落啊，樓梯樓梯同樓梯啊，點解唔係一直上就到呢？行咗勁耐，終於都到喇！上到頂係靚嘅，360度靚景任睇，一邊望到沙田，另一邊又有水塘！上到頂當然要影相啦，而我又奇蹟地坐到上支標高柱度，真係好有成功感！行得咁攰，梗係要食野啦，我帶咗自己整嘅朱古力曲奇上山，雖然整得好甜又好痴牙，龜寶都食咗好多塊啊！龜寶話我哋行得算慢喇，上次佢一個人上去都係用咗35分鐘咋，梗係啦，你帶住隻烏龜，快極有限啦！

 

今日啱啱開始上山無幾耐就遇到蛇喇，好彩係離遠見到佢，而佢都係喺樓梯路過啫，龜寶問我仲行唔行，蛇邊度有㗎啦，行嘅時候小心d就得喇。爸爸曾經講過有水嘅地方就會有蛇有老鼠，我估水塘附近有蛇都係好正常事嘅。

城門道 > 主壩 > 麥理浩徑第七段 > 針山 > 城門道

（長度約7.5公里，需時約2.5小時）

交通：(起點) 由荃灣搭小巴82號、(終點)小巴82號往荃灣

難度：★ ★ ★ ☆ ☆     係好多樓梯，但距離唔算好長，還可以啦！

風景：★ ★ ★ ☆ ☆     好天氣又有靚景，辛苦行上去係值得嘅！

【高估咗自己能力】大嶼山・婆髻山

婆髻山位於東涌東南面嘅，高海拔482米。雖然無大東山同鳳凰山咁高，但要由地面爬升多達450米，係一段連綿不斷嘅山脊路，少d體力都唔得。

我哋由東涌地鐵站起步沿住翔東路行，一開始Annie話抄小徑去起點，我以為係行馬路或者爆林，但條路異常地正常，都唔係我想像中所謂嘅捷徑。不過一黎就天梯，係望唔到盡頭嘅天梯，似係俾維修人員行嗰d石屎樓梯，又密又多級！行完樓梯繼續行泥路上山，之前呢度發生過山火，所有野燒到黑晒，都幾恐怖。我哋差少少就miss咗上婆髻山條路喇，好彩Annie發現行行吓座山喺我地後面，我哋先返轉頭咋。不過上山條路真係好斜，上都已經好吃力，落係跣住落咁，Annie仲可以單手拎電話拍片，佩服佩服，我叫佢小心d唔好跣落黎，佢叫我唔洗擔心佢跣咗我會知㗎喇，梗係啦我喺佢前面吖嘛，有咩事一齊碌落去⋯⋯

可能太耐無行又無運動，我真係覺得好攰頂唔緊，雖然陰陰地係幾好行嘅，但本來我哋想行婆髻山經蓮花山同大東山落百公拗嘅，我呢個小廢廢不行了⋯⋯如果要完成原本個plan我哋就要加加加加速喇，所以上完婆髻山都係原路折返啦。早咗落山我哋就食咗個加加大碼邊爐，正！但我哋無乜點郁消耗唔多喎，恭喜大家增肥成功～

隔咗一段時間無行山，唔係我病就落雨，然後Annie又去旅行，終於等到佢返黎一齊行山喇！唔知下次係幾時呢？

東涌地鐵站 > 翔東路 > 婆髻山 > 翔東路 > 東涌地鐵站 

（長度約7公里，需時約5小時）

難度：★ ★ ★ ☆ ☆     路線唔長，但開始有少少樓梯，上山坡度好斜

風景：★ ☆ ☆ ☆ ☆     今日好大霧，上到頂白濛濛一片，乜都睇唔到

【原來青衣都有山】新界中・青衣自然徑

青衣自然徑又叫做青衣回歸紀念徑，係觀賞青馬大橋嘅熱門山徑。呢條路線途中有四個紀念亭，而且沿路嘅梯級都鋪得好靚又細級，仲有扶手添，真係大人細路都行到。

雖然今日個天陰陰沈沈，天文台仲話會落雨，但都無阻我同Annie上山！我哋今日揀咗條超級輕鬆而且比較短嘅路線，咁就算落雨都容易d撤退吖嘛。 我哋由長宏邨出發，沿住斜路行上少少就到青衣自然徑喇。

我諗住自然徑應該係好輕鬆無乜樓梯啦，一開始就有條唔算短嘅樓梯迎接我哋，我諗多咗喇。一開始無乜景睇，但都唔算辛苦，只係每次上樓梯我都好懶惰行得好～～慢，然後Annie就開始錄低我呢隻烏龜，搞到我唔敢停⋯⋯上到頂見到青馬大橋真係好靚，可惜天氣唔好，陰陰沈沈，影唔到靚相。反而另一面有藍天白雲，兩個世界咁，睇到成個青衣同埋好遠嘅唔知咩山。不過我哋都未搵到影青馬大橋相個影相位，係我哋high得濟miss咗，定係d樹生高咗遮住咗呢？未行嘅時候見到呢條自然徑有好多分岔路，怕會行錯路蕩失路，但行完就知道唔會啦，因為每個分岔口都有指示牌，仲有地圖，話埋俾你知身處何方，好清楚㗎！

平時我同Annie行山好少會帶咁多乾糧嘅，今日我哋兩個一齊食咗三包繽紛樂，食仲多過行，點搞啊，真係到下世都減唔到肥啦！不過帶咗都好過唔帶嘅，有起事上黎都有得食吖嘛。本來我哋想上埋對面座三支香㗎，但開始落毛毛雨，我又好懶惰，所以下次先啦！

長宏邨 > 青衣自然徑 > 青衣西路 （長度約3公里，需時約2小時）

交通：由青衣搭巴士去長宏邨、搭巴士51號去荃灣鐵路站

難度：★ ☆ ☆ ☆ ☆     有少少樓梯，而且好細級好好行，算係輕鬆啦

風景：★ ★ ☆ ☆ ☆     由山上面睇青馬大橋原來係唔同d

【今年第一個日出】新界中・大帽山

大帽山位於新界中部，高海拔957米，係香港最高嘅山峰，不過因為經常都好大霧，所以又叫「大霧山」或者「白果山」。呢度山高霧多，寒冬時仲會結霜，唔少人會喺凌晨上山，一睹結霜景觀。

新年快樂！2018年有咩想做？去睇日出吖！隨口嘅一句，龜寶上網做晒資料搜集，元旦嘅一大清晨就帶咗我上大帽山睇日出！我哋食完早餐就搭的士上山，本來想搭車上到閘口㗎，但的士司機唔肯上，我哋唯有行多d啦。我哋沿住大帽山道行，雖然全程都係上斜嘅馬路，完全無樓梯，但都有少少吃力。一開始嘅時候，我無諗過夜晚行山都咁光，唔洗開電筒都睇到路，但行得愈高就愈黎愈大霧，開咗電筒都淨係睇到前三四米嘅路。 可能因為睇唔到山頂，行極都唔知自己行咗幾多，感覺好似行得好慢，仲有好耐先到咁，同時又要趕喺日出前上到，龜寶就用正常速度行啫，但我已經加緊速喇，我認我係小廢廢⋯⋯而且山上面好凍，所以我哋著咗好多衫，但未到頂我已經出晒汗濕晒喇。 我哋大約6點上到一個有好多帳篷嘅地方，就停咗喺度set野等日出，一黎好似有排都未到頂，二黎呢到都咁大霧山頂會更大霧。

 

等嘅過程好凍同埋好凍，行上黎出咗汗濕晒，上面又無地方換衫，好彩唔大風咋，如果唔係我凍死咗喇。等咗成個鐘終於日出喇，不過霧大咗少少，雲又厚咗少少，睇唔到咸蛋黃。雖然係咁，但呢次係我第一次睇日出，亦都係我睇過最靚嘅日出，重點係同邊個睇嘅。我估日出呢d咁神聖嘅野，要行多幾次先補足到，希望下次會再靚d啦！

大帽山郊野公園遊客中心 > 大帽山道 > 大帽山頂 > 荃錦公路

（長度約8.5公里，需時約2.5小時）

交通：(起點) 搭的士去大帽山郊野公園遊客中心、

(終點) 搭巴士51號去荃灣鐵路站

難度：★ ★ ★ ☆ ☆     全程都係馬路，但路程比較長

風景：★ ★ ☆ ☆ ☆     日出係靚嘅，如果無咁大霧會好好多

【輕鬆上山睇維港】香港島・紅香爐峰

紅香爐峰位於香港島北角寶馬山西南面，係一座標高220米嘅小山峰。喺山上可以遠眺維多利亞港至鯉魚門一帶嘅景色，係唔少攝影發燒友影日落同夜景嘅好地方。

今日趁好天又得閑，最重要又有人陪就要行多d山喇！今日我同Annie行咗 紅香爐峰，我哋喺金鐘搭小巴上畢拉山道，Annie話應該喺總站落車，但我哋最後跟住個疑似行山客喺尾二個站落。好彩我哋無喺最後落咋，唔係又行多一大段路！全條畢拉山道都係馬路，又唔係好斜輕鬆嘅，只係中間經過個地盤有少少大塵，其實係好大塵，真係沙塵滾滾！之後沿住金督馳馬徑行上山頂，平路一大段，都係輕輕鬆鬆嘅，直到上山嗰段先只真係「行山」。上山嗰段有少少需要手腳並用，尤其係上到去有好多大石，然後發現標高柱喺一堆亂石頂！

好辛苦咁爬上標高柱之後，就會發現雖然呢度唔係好高，得二百幾米，但景觀一樣可以好開揚！其實落山可以好輕鬆㗎，但Annie話未行過呢條路，我睇落又正正常常，所以就跟佢行啦，點知就出事喇！落到去係一個排水口，污糟嘅臭嘅，Annie仲話一定有路走，搞咗好耐先肯返轉頭，係啊條路咪就係我哋落黎嗰條囉⋯⋯上返去行行吓見到一條石屎樓梯，又行，結局係我哋要爬欄杆出馬路。

其實今次條路好輕鬆好易行，係我哋唔跟住個計劃喺度搞搞陣，又俾Annie伏咗。今次學到嘅係一定要跟住個plan行，就算真係要抄小路都要有原因有證據，睇地圖check咗條路係可行先好行。不斷聽Annie講喺呢度喇，唔洗睇地圖啦，係會出事㗎！其實我都唔啱，唔應該俾佢亂黎，無事應該偷笑喇⋯⋯

畢拉山道 > 金督馳馬徑 > 紅香爐峰 > 寶馬山道

（長度約4公里，需時約2小時）

交通：(起點) 由金鐘搭小巴24M去畢拉山道、(終點)搭小巴25號去銅鑼灣

難度：★ ☆ ☆ ☆ ☆     平路多無乜樓梯，但上山要小心d

風景：★ ★ ★ ☆ ☆     好靚嘅維港，無睇過都唔知原來咁靚

【行海洋公園座山】香港島・南朗山

海洋公園就去得多喇， 但後面嘅南朗山又有無去過呢？南朗山位於香港島南邊，高海拔284米。雖然山唔算高，但勝在路程較短，而且又可以一睹港島南區嘅風景。

以為唔洗返工會多d時間行山？我好似諗多咗⋯⋯我唔洗返工啫，人哋有野做㗎嘛！難得嘅公眾假期，梗係約行山啦！千欣話想行d合家歡路線，其實佢次次都咁講㗎啦，我次次都伏佢嘅，今次應該輕鬆d嘅⋯⋯今次好大膽地帶千欣行自己都未行過嘅山，開始都有少少驚，但揀咗條又短又簡單嘅，大不了就花多d時間揾路⋯⋯其實揀條短嘅都係想留多少少時間影相啫！

我哋由黃竹坑地鐵站出發，沿住南朗山道行至南朗山休憩公園，再接上山徑登上南朗山。今次係Annie介紹我哋行嘅，佢話輕鬆但多樓梯，唔難行嘅。不過好似太簡單，眨吓眼就到咗，其實都無想像中咁多樓梯，連千欣都話輕鬆，又係佢話要合家歡嘅，下次都係繼續伏佢好d，嘻嘻嘻！上到個直升機坪我哋就抖咗陣，影咗好多相，仲影咗畢業相添，開心開心！喺上面用另一個角度睇海洋公園，同時見到淺水灣、深水灣，個景好濶㗎！反而喺發射站個景無咁靚，雖然高好多，但有比較多植物遮住咗，影相都係喺直升機坪影靚d。

輕輕鬆鬆行山，當係熱吓身，下次再行d難少少㗎啦！要開始為揹水一戰準備吓喇，唔係追唔上大隊喇！

黃竹坑地鐵站 > 南朗山休憩公園 > 南朗山 > 黃竹坑地鐵站 

（長度約5.5公里，需時約1.5小時）

難度：★ ☆ ☆ ☆ ☆     好輕鬆，係有少肖樓梯啦

風景：★ ★ ★ ☆ ☆     好大個海景，又有海洋公園！

【趕住上山睇日落】香港島・西高山

西高山位於香港島西面，高海拔494米，係香港島西面最高嘅山。山上面無阻擋物非常開揚，可以一覽遼闊嘅景觀，係個睇日落嘅好地方。

城市人生活忙碌，但就算幾忙，點都要擠d時間放鬆吓嘅。今日我同Annie行山，但由於時間唔多，所以我哋揀咗近市區嘅西高山。諗住無乜時間，所以行市區嘅山，點知淨係撘巴士上太平山山頂嘅起點已經用咗個幾鐘，早知咁耐就撘纜車啦，來回車費都係貴一倍，但就可以慳返好多時間。沿住夏力道行，無幾耐就去到一個休憩花園，喺涼亭後面有條樓梯，就係上西高山㗎喇！好啦，見到已經唔想行，又係樓梯，淨係得樓梯⋯⋯望吓山頂又望吓宜家企嘅位置，感覺唔算好遙遠，但真係好高！我一路行一路嗌死，全部都係樓梯啊，停低抖抖嘅時間都無，但上到頂又真係好靚嘅！我哋上到去已經開始日落喇，喺呢度睇日落好靚，而且今日天氣特別好，山頂又無野遮住，對住個海加埋個咸蛋黃好靚，可惜我哋唔可以留太耐，又要急急腳落山喇，本來想行去薄扶林水塘走㗎，但撘車用咗太多時間喇，今日只好原路折返啦⋯⋯

喺繁忙嘅生活入面，擠到少少時間放鬆吓真係唔容易，今日我學識到行山不在乎長短，只在乎同朋友行吓山放鬆一吓，當然有美景襯托一吓就更好啦！

夏力道 > 西高山 > 夏力道（長度約4公里，需時約1小時）

交通：(起點) 由交易廣場搭巴士6號去山頂、(終點)纜車

難度：★ ★ ☆ ☆ ☆     其實都唔算好難行，係有一段樓梯，少少辛苦啦

風景：★ ★ ★ ★ ☆     海景加夕陽，仲有好天氣，靚靚！ 

【西貢大自然奇觀】西貢・萬宜水庫東壩 + 破邊洲

萬宜水庫同破邊洲屬於西貢東郊野公園嘅一部分，由於無乜車入到呢邊，所以無乜退路，如果有事要走唔容易，而且唯一嘅退路係行返出大馬路，所以行之前一定要仔細計劃好。

我一直都好想行西貢郊野公園呢邊，對我黎講呢邊好仙境同時好神秘！今日趁好天，又開始入秋，應該會輕鬆少少同無咁熱，龜寶帶我去萬宜水庫同破邊洲啊！開心開心！之前見Annie曬萬宜水庫d相，勁靚勁羡慕，今日到我去喇，唔洗恨啦！

我哋搭巴士去到麥理浩徑第一段起點開始行入去，本來我以為麥徑應該會係山路，點知一路行到入萬宜水庫東壩都係馬路，全程都算係輕鬆，只係路程長咗d同少少悶咁啦⋯⋯因為係行馬路，所以行嘅時候都要小心車，尤其係轉彎位，龜寶成日提我要行外彎，唔係d車就睇唔到我哋喇。除咗車之外，仲有好多牛，都要小心避開佢哋啊，我哋仲研究邊隻係公牛邊隻係母牛，龜寶第一次發現原來公牛同母牛都有角㗎！佢仲話點解黃牛d皮膚好d，都無烏蠅；黑牛d皮膚差d，好多烏蠅嬲住，其實係唔係乾唔乾淨嘅問題咋⋯⋯

行咗勁耐終於到萬宜水庫東壩，都唔係好攰，不過隻腳就無乜感覺咁。我哋食咗個好好好簡單嘅Lunch，淨係食咗兩塊排包沖咗支水動樂，然後抖咗一陣就起行行去破邊洲喇。我哋由紀念碑旁邊嘅山路上山，第一眼見到條樓梯已經攰咗⋯⋯行完條樓梯發現樓梯事小，密林事大！ 比起之前嘅密林，呢個係行過最密嘅密林，而且仲要係大上大落，真係肥d都過唔到，好彩著咗長褲無刮花，沿路我舉高雙手，真係投晒降！我行前面龜寶行後面，我kick親失平衡嘅時候，佢都會足實我，雖然我行得好慢，佢都無催我，安全至上！喺山上面除咗望到破邊洲，仲望到好靚嘅撿豬灣，龜寶應該都係呢度執我返去咋！因為係一個石灘，d石頭全部都係圓碌碌㗎，海水拍打岸邊嘅時候d聲好清翠～

行到最近距離睇破邊洲好靚，d 六角岩柱好震撼，同時企喺條邊邊好驚der！龜寶淨係掛住影相，好似完全唔洗睇路咁，真係嚇死寶寶！破邊洲以前其實係花山嘅一部分，不過有海水侵蝕，慢慢由海蝕洞變成海蝕拱，再變成宜家完全分開咗嘅海蝕柱。回程嘅時候我哋行咗條捷徑，雖然唔洗再跨過花山，但難度一樣咁高，我哋仲落咗卵石灣玩，不過好多垃圾好臭，最後仲要爬過d防波堤先去到安全嘅位置。d防波堤睇落好易爬，但原來勁大舊好難爬㗎，中間d隙勁大勁深，唔小心跌落去就玩完喇！

本來諗住行返出去㗎，但我哋太攰喇，又無晒水，所以我哋都係call的士出去。好彩有得call的士咋，要行返出去應該天黑喇～

上窰 > 麥理浩徑第一段 > 萬宜水庫東壩（長度約9公里，需時約2小時）

交通：(起點) 由鑽石山搭巴士92號去西貢再轉車搭巴士92號去上窰、

(終點) 的士

難度：★ ★ ☆ ☆ ☆     全部都係馬路，但有d長⋯⋯

風景：★ ★ ☆ ☆ ☆     喺馬路無乜特別，間中會見到萬宜水庫，都幾靚！

萬宜水庫東壩 > 花山 > 破邊洲 > 卵石灣 > 萬宜東壩地質步道

（長度約4.5公里，需時約2.5小時）

難度：★ ★ ★ ★ ☆     超級密林，要好好好小心

風景：★ ★ ★ ☆ ☆     山頂個景好闊好靚，破邊洲d六角岩柱好壯觀！