【連續行咗三日山】西貢・東洋山

東洋山喺大老山西面，係飛鵝山脈向東北延伸嘅分支，高海拔533米，但山頂無牌都無標高柱。喺山頂可飽覽360度景觀，要上東洋山有幾條路線選擇，其中一條就係衛奕信徑第四段。

其實今日醒嘅時候好攰，全身散晒咁，好想留喺屋企抖吓㗎，但一早已經約咗爸爸今日行山，而且天氣又好，黎緊又會打風，所以都係趁有得行好行喇。今日同爸爸、嘉偉同Annie由井欄樹行上東洋山，即係衛奕信徑第四段。

本來以為呢條路應該幾輕鬆，唔會太辛苦㗎，一開始都ok嘅，但由大藍湖上山嗰段都好甘吓啊，中間都唔知抖咗幾多次先上到頂。只怪自己無做足功課先上山啦，原來呢段要急上400米，一直都係天梯天梯同天梯，行極都未到，爸爸係咁呃我話好快到，見到頂喇，但我睇地圖發現一半都未到，真心灰咗！上頂嗰段係一條好窄嘅小路，上去都還可以，但落黎我就跣低咗兩次⋯⋯不過山頂上面係好靚嘅，見到白沙灣、飛鵝山、八仙嶺等等。如果下次行快少少，早少少上山，應該會仲靚d！之後我哋就沿住飛鵝山道行返去沙田坳，中途經過飛鵝山觀景台嘅時候已經係黃昏，個天紅紅地黃黃地金金地好靚！不過最後呢段行馬路係悶d嘅，不過都算輕鬆，下次可以試吓行其他路線走啊！

今次係我第一次行山遇到蛇，條蛇黑鼆鼆勁大條，睇落都有兩米㗎，不過爸爸話無毒嘅，但咬到會好痛咁啫。唔洗咬啦，見到都俾佢嚇死啦！之後我一路行一路諗如果喺d好窄嘅路遇到蛇，咁咪無得走？如果下次爸爸唔一齊行咁點算？唔好諗喇，愈諗愈驚驚，都係上網搵定資料，下次真係再發生都知點做吖！

井欄樹 > 黃麍仔 > 大藍湖 > 東洋山 > 沙田坳道 > 黃大仙地鐵站 

（長度約11.2公里，需時約4.5小時）

交通：(起點) 由鑽石山巴士總站搭91巴士去井欄樹、(終點)黃大仙地鐵站

難度：★ ★ ★ ★ ☆     上頂段樓梯真係好甘，不過馬路又好輕鬆

風景：★ ★ ★ ☆ ☆     喺山上面真係睇得晒360度嘅山景

【唔行唔知咁辛苦】新界西・大刀屻

大刀屻高海拔566米，位於大埔林錦公路同粉錦公路之間。山峰兩側就好似懸崖咁，形狀似刀刃向上，因而得名。雖然山名為刀屻，但山徑唔算非常險要；喺山上可以飽覽新界東西美景，無高樓大廈、無繁忙嘅街道，映入眼簾嘅係一片翠綠而平靜嘅土地。

今日我同Annie即興上咗大刀屻，我哋有叫千欣㗎，係佢唔得閑咋。大刀屻喺新界西北部，高566米。好多人都會由嘉道理農場行去粉嶺，但一開始就要急上300米，Annie話粉嶺行返轉頭會輕鬆d，但佢好似唔多可信⋯⋯

我哋由粉嶺出發，由蓬瀛仙館旁停車場嘅樓梯上山，經過北大刀屻涼亭接上大刀屻徑，一直走到林錦公路大刀屻徑嘅入口。由一開始不斷上斜，之後就無限天梯，好似已經係行山必經咁。不過今日同平時好唔同，不斷大幅上落，Annie話「上幾多，落幾多；落幾多，上幾多」，行到我腳軟！行咗勁勁勁耐， 有少少失望咁以為miss咗北大刀屻個牌，好開心咁行去大刀屻，點知⋯⋯悲劇！我哋無miss度北大刀屻，只係我哋未行到咋，嗰刻真係好想係miss咗，因為我已經行到好攰，無晒力喇。而且今日天氣有d曬、超級熱同完全無風，行到我身水身汗咁，下次行山應該要帶把扇。最最最慘嘅係有勁多蚊同烏蠅，一入到樹陰下面就勁多，不停喺耳邊嗡嗡嗡，全程不斷嗡無停過，煩到一個點。Annie話上年秋天行嘅時候無㗎，點知一到夏天就勁多。以為喺開揚嘅地方會好d？錯喇，無咗蚊同烏蠅，但就有好多其他飛飛，繼續煩⋯⋯不過係煩少咗嘅。

上到大刀屻山頂嘅時候，我終於覺得我d汗水無白流，雖然唔係無敵大海景，但360度嘅景觀真係好正，喺度望返去大帽山好壯觀。再行前少少有Annie好中意嘅巨石，但今次我唔俾佢爬啊，我哋都無企喺好邊邊影相，因為呢度真係好危險，已經有鐵鍊圍住，而且有好多飛飛，我哋一驚一叫或者我哋就會跌落山喇⋯⋯行到呢度我餓到定唔住喇，坐喺石邊就嘆我舊紫薯，但d飛飛逼到我要行住食。落山嘅時候我係有d驚㗎，已經黃昏開始暗，而且愈夜愈多蚊，仲要好似行極都未到咁，不過都係自己嚇自己啫。

今次係攰嘅，仲要係堅攰，不斷上落樓梯，又要不停撥蚊，係身心俱疲啊！好彩千欣無跟上黎咋，唔係一定鬧爆我，行到發晒脾氣咁。下次如果帶埋千欣應該要由嘉道理農場上之後原路折返，仲要喺冬天先上黎，一黎無咁熱，二黎應該少d蚊嘅，希望啦。

粉嶺火車站 > 程其坑 > 北大刀屻 > 大刀屻 > 嘉道理農場

（長度約10.5公里，需時約4.5小時）

交通：(起點) 粉嶺火車站B出口、(終點)搭64K巴士去大埔火車站

難度：★ ★ ★ ★ ☆     好辛苦啊，係咁上上落落，重點係勁多蚊！

風景：★ ★ ★ ★ ☆     大刀屻係靚嘅，但一開始無乜景

【三個傻的上青山】新界西・青山

青山舊名為杯渡山，高海拔583米，位於屯門，係香港西部最高嘅山峰，其形尖削，被譽為「香港三尖」之一。山頂可以望到屯門，仲可以一睹青山腹地嘅神秘面貌。

今日同千欣同Annie行青山，之前聽龜寶話同朋友行，今次就到我同朋友行喇！龜寶不斷提我好熱好焗，要帶多d水，所以我特登雪咗支冰水。我哋由屯門西鐵站落車，經過屯門IVE接上青山寺徑，沿住上山嘅梯級慢慢向上行。沿途有d危險警告牌，話山路險峻，請登山人士量力而行；千欣不斷話佢應該信d警告，唔應該上黎㗎。

今次我真係覺得好辛苦，唔係講笑，一開始以為無咁辛苦先帶埋千欣㗎，我又伏咗佢喇。由青雲路開始已經係好斜好斜嘅斜路，去到青山寺開始上山全部都係樓梯，係全部！途中只有兩小段斜路，加埋都唔夠20米咁小段。我沿途都係咁嗌攰，但佢哋就話我嗌攰係流料黎，咁上法我嗌唔攰唔辛苦佢哋係咪信先⋯⋯而且今日好熱又無風，雖然唔算好曬，陰陰地，但都行到我哋出晒汗濕晒。上到去個涼亭已經無力喇，我哋喺呢度停咗好耐，抖咗好耐，玩咗好耐，影咗好多相。以前我都唔敢爬大石㗎，可能爬咗幾次就無咁驚，仲推咗千欣上舊石度影相！望住佢爬上爬落，就好似睇住自己第一次爬咁，勁驚青但又要爬，雞手鴨腳咁，哈哈！其實我都驚㗎，但喺千欣面前要扮鎮定，唔可以失威㗎嘛！

我哋玩到差唔多日落，但又無帶電筒，所以要急急腳落山嚕。原本諗住臨走先上山頂，最後都無上。本來plan咗行落良景邨，但因為時間唔夠，要原路折返。唔係每一個旅程都咁完美嘅，有少少遺憾，就留返下次再上黎啦。短期內應該唔會再上黎住，宜家見到樓梯就嗌救命！

屯門西鐵站 > 青雲路 > 青山寺 > 青山 > 青雲路

 (長度約7公里，需時約4小時)

交通：(起點) 屯門西鐵站B出口、(終點)輕鐵青雲站

難度：★ ★ ★ ☆ ☆     成條路都好急斜，全部都係樓梯，不過都算短程嘅

風景：★ ★ ☆ ☆ ☆     秘嘅青山腹地真係好靚