【爸爸輕鬆上三尖】西貢・釣魚翁

究竟香港邊座山先算尖？位於西貢清水灣半島嘅釣魚翁，高海拔344米，就係「香港三尖」之一喇。有人話釣魚翁唔係好尖啫，我相信只係角度問題，只要搵啱位，釣魚翁真係有一種「尖得離奇」嘅感覺。

趁今日端午節爸爸放假，咁啱又好天唔落雨，我又帶爸爸去行山喇～今日行釣魚翁，雖然都算係合家歡路線，但上山嗰段都辛苦㗎，而且今次仲帶埋千欣添。其實開始之前有少少驚會伏咗佢，對佢黎講可能會太難喇，所以我有提佢要著運動衫同運動鞋，我好驚佢又著拖鞋或者高踭鞋出黎⋯⋯

係啊，又行釣魚翁啊，幾個月之前先同Annie行過，但今次我哋無再行去五塊田， 要慳返d時間喺山上面睇風景吖嘛！其實今次都行得太快，又miss咗直上釣魚翁嘅路口喇，好彩行行吓拎部電話出黎睇行到邊咋，都係行過咗200米啫。 地圖上呢條路叫未命名，比起行釣魚翁郊遊徑，喺樹蔭下行乜都睇唔到，喺呢邊睇釣魚翁真係好尖。雖然呢條路好窄，窄到只可以一個人行，仲要肥少少都過唔到，同埋有好多草撩住隻腳，但沿途都可以望到釣魚翁，有d位都好開揚好靚。千欣行呢段嘅時候想殺咗我咁濟，因為佢話我無提佢著長褲，搞到俾草撩住晒，其實我都係第一次行呢條路，我點知咁窄喎。到上頂嗰一段路，呢邊反而仲好行，雖然都係要手腳並用爬山，但呢邊多d石可以踩，而另一邊就多d沙路，相對比較跣，千欣落山嘅時候都跣咗兩三次。相反爸爸勁犀利， 喺山度跑上跑落彈吓彈吓咁，完全係輕鬆無難度。

今日天氣都算係幾好㗎喇，藍天白雲唔落雨，係有少少少少霧啫，所以個景都好靚啊，但紅日有好多人，我哋都係停留咗一陣就落山嚕。影相嘅時候我都唔係企得好出啫，我咁怕死點會企咁出吖，但爸爸都覺得危險，如果爸爸同Annie行山，就知咩叫危險喇！落山之後我哋就轉左行落清水灣道，無再行去下田山，怕千欣頂唔緊啊⋯⋯今日成程都係行咗兩個半鐘，唔係好多啫，但第一次同千欣行要顧及佢嘅能力，所以就唔行去下田山喇，一陣嚇親佢以後都唔同我行。好彩千欣話唔辛苦，仲好開心添，叫我下次行山預埋佢，下次又多一個隊友喇～

五塊田 > 釣魚翁 > 相思灣路（長度約5.2公里，需時約2.5小時）

交通：(起點) 由將軍澳搭103M小巴去五塊田、

(終點)搭91巴士去鑽石山巴士總站
難度：★ ★ ★ ☆ ☆     上山嘅路要手腳並用，但唔算係十分難行嘅

風景：★ ★ ★ ★ ☆     山頂有180度嘅靚海景，仲睇到好尖嘅釣魚翁添

【香港最南嘅燈塔】香港島・鶴咀

終於都忙完FYP，正式完sem喇～ 梗係要去行山放鬆吓啦！已經三個月無行過山喇，今日同Annie輕輕鬆鬆行鶴咀，喺香港島東南端嘅鶴咀半島，石澳泳灘附近，不過今日真係似郊遊多過行山囉⋯⋯

同入石澳一樣，喺筲箕灣搭小巴入起點鶴咀道，但原來要喺土地灣落車行過去㗎，一開頭唔知仲俾司機講咗兩句⋯⋯之後沿住馬路行去第一站機槍堡，去到左邊有間屋仔右邊有條向下行嘅小路，就行條小路落去。Annie話機槍堡好靚㗎，所以就信佢行啦，其實一路都唔知有乜咁靚，覺得咪又係砲台之類咁啦。條小路都真係好窄，同埋係無指示可言，全靠d絲帶帶路。幾乎全程都喺樹蔭底下，仲有好多樹滕吊落黎，好多時都要彎低身行，又要多碎石同樹根，行落都好辛苦同少少危險啦，想慢慢行小心d，但又有好多好多好多蚊同昆蟲咬，所以好想快d行完，整體黎講呢段路就係好辛苦同時又唔敢停。用咗大約半個鐘終於到喇，發現原來呢度真係好靚，唔係講緊個機槍堡，而係個景，d水又勁清，坐喺岸邊嘆吓海浪好正，Annie形容我哋好似去咗夏威夷咁。我哋喺呢度逗留咗好耐，玩咗好耐都唔想返去，因為呢度真係好靚，同埋唔想入去條勁多蚊嘅路啊！

之後沿住馬路繼續行去鶴咀海岸保護區，唔算好辛苦，但因為成日有車出入，而且條路好窄，先啱啱夠一架車過，所以要小心車有小小危險啦。中間經過d村有好多狗，真係好多，全部都係唐狗之類嘅大狗，好彩佢哋都好乖唔吠唔追人，其實唔理佢哋唔搞佢哋都ok嘅。去到鶴咀，坐喺d石上面，聽住海水拍打岸邊嘅聲，望住無邊無際嘅大海，真係好舒服。不過爬上d石嘅時候真係要好小心，坐嘅時候都要揀好位先坐，因為有d好尖嘅石會拮pat pat㗎！同埋Annie其實影相同睇景唔洗企咁出㗎，企入少少都影到睇到㗎，次次都想嚇死我，如果唔小心跌咗落海點算？喺d石嘅下面有個叫蟹洞嘅石，係俾海水拍打變成嘅海蝕洞，都好特別㗎！可惜係搵唔到雷音洞啦⋯⋯

最後我哋去咗鶴咀必去嘅燈塔，係香港第一座燈塔，由1875年已經開始啟用，有好耐歷史㗎喇。雖然係古蹟，但一d都唔老土㗎，無論近睇遠睇都好靚。我哋影影吓仲有一對新人黎影婚紗相添，其實嗎度影真係好浪漫，但著住婚紗入去就真係好熱嘅⋯⋯我哋都係影完就走，唔阻人sweet啦，沿住馬路行返出鶴咀道迴旋處搭巴士，勁好彩啱啱有巴士唔洗企喺度餵蚊！今日玩咗6個幾鐘，行嘅時間真係好少，玩咗好耐但都未玩夠啊，下次要用多d時間搵海蝕洞！

大風坳 > 機槍堡 > 鶴咀海岸保護區 > 燈塔 > 大風坳（長度約9.6公里）

交通：(起點) 由筲箕灣搭小巴去土地灣、(終點) 搭9巴士去筲箕灣

難度：★ ★ ☆ ☆ ☆    除咗落機槍堡嗰段之外，全程都係馬路

風景：★ ★ ★ ★ ☆    鶴咀海岸個景好靚，成個海睇晒，而且d水又好清