【輕鬆上山睇維港】香港島・紅香爐峰

紅香爐峰位於香港島北角寶馬山西南面，係一座標高220米嘅小山峰。喺山上可以遠眺維多利亞港至鯉魚門一帶嘅景色，係唔少攝影發燒友影日落同夜景嘅好地方。

今日趁好天又得閑，最重要又有人陪就要行多d山喇！今日我同Annie行咗 紅香爐峰，我哋喺金鐘搭小巴上畢拉山道，Annie話應該喺總站落車，但我哋最後跟住個疑似行山客喺尾二個站落。好彩我哋無喺最後落咋，唔係又行多一大段路！全條畢拉山道都係馬路，又唔係好斜輕鬆嘅，只係中間經過個地盤有少少大塵，其實係好大塵，真係沙塵滾滾！之後沿住金督馳馬徑行上山頂，平路一大段，都係輕輕鬆鬆嘅，直到上山嗰段先只真係「行山」。上山嗰段有少少需要手腳並用，尤其係上到去有好多大石，然後發現標高柱喺一堆亂石頂！

好辛苦咁爬上標高柱之後，就會發現雖然呢度唔係好高，得二百幾米，但景觀一樣可以好開揚！其實落山可以好輕鬆㗎，但Annie話未行過呢條路，我睇落又正正常常，所以就跟佢行啦，點知就出事喇！落到去係一個排水口，污糟嘅臭嘅，Annie仲話一定有路走，搞咗好耐先肯返轉頭，係啊條路咪就係我哋落黎嗰條囉⋯⋯上返去行行吓見到一條石屎樓梯，又行，結局係我哋要爬欄杆出馬路。

其實今次條路好輕鬆好易行，係我哋唔跟住個計劃喺度搞搞陣，又俾Annie伏咗。今次學到嘅係一定要跟住個plan行，就算真係要抄小路都要有原因有證據，睇地圖check咗條路係可行先好行。不斷聽Annie講喺呢度喇，唔洗睇地圖啦，係會出事㗎！其實我都唔啱，唔應該俾佢亂黎，無事應該偷笑喇⋯⋯

畢拉山道 > 金督馳馬徑 > 紅香爐峰 > 寶馬山道

（長度約4公里，需時約2小時）

交通：(起點) 由金鐘搭小巴24M去畢拉山道、(終點)搭小巴25號去銅鑼灣

難度：★ ☆ ☆ ☆ ☆     平路多無乜樓梯，但上山要小心d

風景：★ ★ ★ ☆ ☆     好靚嘅維港，無睇過都唔知原來咁靚

【行海洋公園座山】香港島・南朗山

海洋公園就去得多喇， 但後面嘅南朗山又有無去過呢？南朗山位於香港島南邊，高海拔284米。雖然山唔算高，但勝在路程較短，而且又可以一睹港島南區嘅風景。

以為唔洗返工會多d時間行山？我好似諗多咗⋯⋯我唔洗返工啫，人哋有野做㗎嘛！難得嘅公眾假期，梗係約行山啦！千欣話想行d合家歡路線，其實佢次次都咁講㗎啦，我次次都伏佢嘅，今次應該輕鬆d嘅⋯⋯今次好大膽地帶千欣行自己都未行過嘅山，開始都有少少驚，但揀咗條又短又簡單嘅，大不了就花多d時間揾路⋯⋯其實揀條短嘅都係想留多少少時間影相啫！

我哋由黃竹坑地鐵站出發，沿住南朗山道行至南朗山休憩公園，再接上山徑登上南朗山。今次係Annie介紹我哋行嘅，佢話輕鬆但多樓梯，唔難行嘅。不過好似太簡單，眨吓眼就到咗，其實都無想像中咁多樓梯，連千欣都話輕鬆，又係佢話要合家歡嘅，下次都係繼續伏佢好d，嘻嘻嘻！上到個直升機坪我哋就抖咗陣，影咗好多相，仲影咗畢業相添，開心開心！喺上面用另一個角度睇海洋公園，同時見到淺水灣、深水灣，個景好濶㗎！反而喺發射站個景無咁靚，雖然高好多，但有比較多植物遮住咗，影相都係喺直升機坪影靚d。

輕輕鬆鬆行山，當係熱吓身，下次再行d難少少㗎啦！要開始為揹水一戰準備吓喇，唔係追唔上大隊喇！

黃竹坑地鐵站 > 南朗山休憩公園 > 南朗山 > 黃竹坑地鐵站 

（長度約5.5公里，需時約1.5小時）

難度：★ ☆ ☆ ☆ ☆     好輕鬆，係有少肖樓梯啦

風景：★ ★ ★ ☆ ☆     好大個海景，又有海洋公園！

【趕住上山睇日落】香港島・西高山

西高山位於香港島西面，高海拔494米，係香港島西面最高嘅山。山上面無阻擋物非常開揚，可以一覽遼闊嘅景觀，係個睇日落嘅好地方。

城市人生活忙碌，但就算幾忙，點都要擠d時間放鬆吓嘅。今日我同Annie行山，但由於時間唔多，所以我哋揀咗近市區嘅西高山。諗住無乜時間，所以行市區嘅山，點知淨係撘巴士上太平山山頂嘅起點已經用咗個幾鐘，早知咁耐就撘纜車啦，來回車費都係貴一倍，但就可以慳返好多時間。沿住夏力道行，無幾耐就去到一個休憩花園，喺涼亭後面有條樓梯，就係上西高山㗎喇！好啦，見到已經唔想行，又係樓梯，淨係得樓梯⋯⋯望吓山頂又望吓宜家企嘅位置，感覺唔算好遙遠，但真係好高！我一路行一路嗌死，全部都係樓梯啊，停低抖抖嘅時間都無，但上到頂又真係好靚嘅！我哋上到去已經開始日落喇，喺呢度睇日落好靚，而且今日天氣特別好，山頂又無野遮住，對住個海加埋個咸蛋黃好靚，可惜我哋唔可以留太耐，又要急急腳落山喇，本來想行去薄扶林水塘走㗎，但撘車用咗太多時間喇，今日只好原路折返啦⋯⋯

喺繁忙嘅生活入面，擠到少少時間放鬆吓真係唔容易，今日我學識到行山不在乎長短，只在乎同朋友行吓山放鬆一吓，當然有美景襯托一吓就更好啦！

夏力道 > 西高山 > 夏力道（長度約4公里，需時約1小時）

交通：(起點) 由交易廣場搭巴士6號去山頂、(終點)纜車

難度：★ ★ ☆ ☆ ☆     其實都唔算好難行，係有一段樓梯，少少辛苦啦

風景：★ ★ ★ ★ ☆     海景加夕陽，仲有好天氣，靚靚！ 

【西貢大自然奇觀】西貢・萬宜水庫東壩 + 破邊洲

萬宜水庫同破邊洲屬於西貢東郊野公園嘅一部分，由於無乜車入到呢邊，所以無乜退路，如果有事要走唔容易，而且唯一嘅退路係行返出大馬路，所以行之前一定要仔細計劃好。

我一直都好想行西貢郊野公園呢邊，對我黎講呢邊好仙境同時好神秘！今日趁好天，又開始入秋，應該會輕鬆少少同無咁熱，龜寶帶我去萬宜水庫同破邊洲啊！開心開心！之前見Annie曬萬宜水庫d相，勁靚勁羡慕，今日到我去喇，唔洗恨啦！

我哋搭巴士去到麥理浩徑第一段起點開始行入去，本來我以為麥徑應該會係山路，點知一路行到入萬宜水庫東壩都係馬路，全程都算係輕鬆，只係路程長咗d同少少悶咁啦⋯⋯因為係行馬路，所以行嘅時候都要小心車，尤其係轉彎位，龜寶成日提我要行外彎，唔係d車就睇唔到我哋喇。除咗車之外，仲有好多牛，都要小心避開佢哋啊，我哋仲研究邊隻係公牛邊隻係母牛，龜寶第一次發現原來公牛同母牛都有角㗎！佢仲話點解黃牛d皮膚好d，都無烏蠅；黑牛d皮膚差d，好多烏蠅嬲住，其實係唔係乾唔乾淨嘅問題咋⋯⋯

行咗勁耐終於到萬宜水庫東壩，都唔係好攰，不過隻腳就無乜感覺咁。我哋食咗個好好好簡單嘅Lunch，淨係食咗兩塊排包沖咗支水動樂，然後抖咗一陣就起行行去破邊洲喇。我哋由紀念碑旁邊嘅山路上山，第一眼見到條樓梯已經攰咗⋯⋯行完條樓梯發現樓梯事小，密林事大！ 比起之前嘅密林，呢個係行過最密嘅密林，而且仲要係大上大落，真係肥d都過唔到，好彩著咗長褲無刮花，沿路我舉高雙手，真係投晒降！我行前面龜寶行後面，我kick親失平衡嘅時候，佢都會足實我，雖然我行得好慢，佢都無催我，安全至上！喺山上面除咗望到破邊洲，仲望到好靚嘅撿豬灣，龜寶應該都係呢度執我返去咋！因為係一個石灘，d石頭全部都係圓碌碌㗎，海水拍打岸邊嘅時候d聲好清翠～

行到最近距離睇破邊洲好靚，d 六角岩柱好震撼，同時企喺條邊邊好驚der！龜寶淨係掛住影相，好似完全唔洗睇路咁，真係嚇死寶寶！破邊洲以前其實係花山嘅一部分，不過有海水侵蝕，慢慢由海蝕洞變成海蝕拱，再變成宜家完全分開咗嘅海蝕柱。回程嘅時候我哋行咗條捷徑，雖然唔洗再跨過花山，但難度一樣咁高，我哋仲落咗卵石灣玩，不過好多垃圾好臭，最後仲要爬過d防波堤先去到安全嘅位置。d防波堤睇落好易爬，但原來勁大舊好難爬㗎，中間d隙勁大勁深，唔小心跌落去就玩完喇！

本來諗住行返出去㗎，但我哋太攰喇，又無晒水，所以我哋都係call的士出去。好彩有得call的士咋，要行返出去應該天黑喇～

上窰 > 麥理浩徑第一段 > 萬宜水庫東壩（長度約9公里，需時約2小時）

交通：(起點) 由鑽石山搭巴士92號去西貢再轉車搭巴士92號去上窰、

(終點) 的士

難度：★ ★ ☆ ☆ ☆     全部都係馬路，但有d長⋯⋯

風景：★ ★ ☆ ☆ ☆     喺馬路無乜特別，間中會見到萬宜水庫，都幾靚！

萬宜水庫東壩 > 花山 > 破邊洲 > 卵石灣 > 萬宜東壩地質步道

（長度約4.5公里，需時約2.5小時）

難度：★ ★ ★ ★ ☆     超級密林，要好好好小心

風景：★ ★ ★ ☆ ☆     山頂個景好闊好靚，破邊洲d六角岩柱好壯觀！

【超超短嘅行山記】九龍・魔鬼山

魔鬼山，又名炮台山，標高222米，位於九龍油塘。呢度曾經係軍事要地，因為可遠眺香港島筲箕灣一帶，係扼守維多利亞港東面入口重要戰略嘅地點。

今日同爸爸同嘉偉行咗魔鬼山，路程短之餘又係九龍區，天氣好嘅時候仲可以望到維港，好靚㗎！今次我哋經由鯉魚門邨上嶺南古廟，去到分岔路再沿住右手邊泥路上，點知話咁快就到頂！山頂其實係個砲台，上面有標高柱，仲寫滿政治口號添！不過真係無諗過咁快，上次同Annie行咗好耐，樓梯無限loop，又上又落又要上斜路，但今次真係眨吓眼就到！唔知係咪天氣好呢？今日有好多人上山，成個砲台都係大人小朋友仲有狗狗！同上次白濛濛相比，今日個景靚好多，維港比太陽照到閃閃爍爍，平時無乜機會喺呢個時間呢個角度去欣賞維港，真係好靚！本來我想企上去個圍牆上面影相，但我平衡力太差喇上唔到，所以我叫咗嘉偉上去，點知都係影唔到，因為背光⋯⋯我哋留咗一陣就走喇，依照指住去油塘嘅路牌落山，又係眨吓眼就到大馬路，一路落斜就返到地鐵站。

今次真係好輕鬆，我哋真係行咗山？定係行咗街咋？應該問點解次次同Annie行都一定會兜路，行遠勁多嘅？ 返咗工之後好耐無行山喇，我好似成日都咁講，但係事實嘛。個個星期六日唔係打風就落雨⋯⋯趁好天點都要行吓嘅，雖然今日條路線好短，但都算係行咗郁咗吖！話說⋯⋯睇返地圖，原來兩次我都無上魔鬼山砲台，淨係上咗歌賦砲台咋，失敗！

油塘地鐵站 > 鯉魚門邨 > 嶺南古廟 > 衛奕信徑第三段 > 歌賦砲台 > 油塘地鐵站（長度約2.3公里，需時約40分鐘）

難度：★ ☆ ☆ ☆ ☆     路程短，仲要係細級樓梯，係有少少泥石路

風景：★ ★ ☆ ☆ ☆     喺高處望住閃閃爍爍嘅維港真係好靚

【週末輕鬆遊大澳】大嶼山・大澳虎山

虎山係香港離島區大澳嘅最高峰，山頂上設有涼亭，喺嗰度可以遠眺大澳、港珠澳大橋同珠江口。而且山上設有幾條海豚模型，遊人可以由山上觀賞跳出海面嘅中華白海豚，不過宜家已經好難發現佢哋嘅蹤影喇。

早幾日Annie話見到網上推介大澳虎山呢條輕鬆路線，講到只係一星級嘅難度，但有五星級嘅風景！其實我記憶中都未去過大澳，所以我哋今日就去玩吓啦！今日有好多人一齊去啊，我哋真係圍威喂多過行山囉，未開始已經係咁食食食同食⋯⋯

我哋約喺東涌地鐵站等，本來call咗車諗住舒舒服服坐去大澳啦，點知原來普通私家車唔入得，要攞禁區紙㗎！最後都係死死地氣去趕巴士⋯⋯入到大澳已經晏就四點半喇，我哋仲有時間嘻嘻哈哈買吓野食睇吓棚屋，先慢慢搵路上山。啱啱開始嘅時候我絕對覺得Annie又伏我哋，首先要行一條勁似維修山坡嘅樓梯，上完樓梯又要沿住去水渠上山，行完水渠又要行沙石路，d沙石路一d都唔好行，好少石d沙又鬆，好跣腳！都唔似山路嘅，如果我哋無繼續行埋上山，我真心覺得Annie玩我哋！但上到去，成個海睇晒，個景好開揚好靚，仲有條鋪得好靚嘅人行步道，點解前後會差咁遠？我哋見有勁多人喺虎山觀景台等睇日落，我估呢度睇日落應該好靚，因為呢度向西，雖然虎山唔算好高，但出面就係海無野遮住。不過始終距離日落仲有好耐，我哋落山繼續玩唔等喇，下次再睇啦！

我哋準備落山嘅時候，見到有一個人訓咗喺地下，雖然覺得有d奇怪，但我哋都無問，當我哋回頭再經過佢嘅時候，佢問我哋有無多嘅水，佢話唔舒服有d頭暈，我哋俾咗一支水一支水動樂同一條朱古力俾佢，希望佢無事啦。經過呢件事之後，我覺得帶齊糧水上山真係好重要，雖然今日條路唔算辛苦，但如果今日我哋無帶多糧水，佢會點算呢⋯⋯

吉慶後街 > 虎山 > 石仔埗街 > 大澳巴士總站

 （長度約2.5公里，需時約1小時）

交通：(起點) 喺東涌撘巴士11號、(終點)撘巴士11號出東涌

難度：★ ★ ☆ ☆ ☆     一開始真係好伏，好彩後面嘅路都好易行

風景：★ ★ ★ ★ ☆     個無敵大海景真係好正！

【週末輕鬆郊遊記】新界中・城門水塘

城門水塘係香港新界西南部嘅一個水塘，位於荃灣區城門谷一帶。喺呢度行山係輕鬆郊遊樂，圍住水塘行一圈，沿途都係絕美嘅景色，其中最靚嘅係白千層夾道，聽聞有好多人黎影婚紗相㗎！

今日同龜寶行城門水塘，傾吓計散吓心，因為佢啱啱傷咗行唔到山，所以行住簡簡單單嘅路線先啦！難得兩個人見到面，行邊都唔緊要啦，反正都係咁開心㗎啦，其實我都係第一次行城門水塘咋嘛！我哋由荃灣地鐵站附近搭82號小巴，直上水塘總站，十幾分鐘就到喇。落車沿住右邊行會直到主壩，但我哋揀咗由左邊開始慢慢行，圍住個水塘行一個圈。一開始有少少樓梯啦，行過呢小段之後全部都係水泥路。龜寶話平時週末好多人行㗎，唔知係咪前一晚個個去晒睇流星呢，人少少靜靜地都幾好吖！水塘側邊有好多白千層，水塘映出白千層嘅倒影，靚到難以形容。全程最最最困擾嘅係馬騮，前段同後段都有好多，中段有少少啦！途中遇到一大班家族遷徙咁，我捉實龜寶唔放，佢話我哋唔搞佢哋就無事㗎喇。話口未完，前面有兩個人撩d馬騮俾馬騮追，龜寶就執咗支棍，話我哋揸住支棍，佢哋就唔敢搞我哋喎。尾段見到有雪糕車，本來都想食㗎，但見到d馬騮追住搶人雪糕，我都係唔買喇⋯⋯

 除咗馬騮，今日仲見到蛇啊，戴住太陽眼鏡睇得唔清楚，我仲以為係樹葉添，行到埋去佢彈起爬走咗，係我俾佢嚇到彈起囉，好彩無踩落去咋，龜寶話係青竹蛇，有毒㗎，我哋急急腳逃跑咗喇！

城門道 > 菠蘿壩 > 主壩 > 城門道（長度約8.5公里，需時約2.5小時）

交通：(起點) 由荃灣搭小巴82號、(終點)小巴82號往荃灣

難度：★ ☆ ☆ ☆ ☆     無乜樓梯，係距離長少少啫，無難度！

風景：★ ★ ★ ☆ ☆     喺市區都有咁靚嘅景，真心靚，正！

【夏天最好行瀑布】新界中・梧桐寨

梧桐寨位於大帽山嘅北邊，係香港出名嘅瀑布群，一共有四條瀑布，包括底瀑、中瀑、主瀑同散髮瀑。要觀賞瀑布一般可以由梧桐寨村接上梧桐寨石澗徑，沿途有樹蔭，唔會太熱，仲可以濕身清涼一吓添。

相隔一個月，終於有機會行山喇，其實難得放假我真係好想行盡d 㗎，不過龜寶話宜家天氣又熱又焗，唔好行長途同太辛苦嘅路線，小心中暑喎⋯⋯最後我同Annie行咗夏天好旺嘅梧桐寨瀑布，有水有樹陰應該輕鬆d嘅。

我哋由大埔火車站搭巴士去到梧桐寨村起點，行咗無幾耐就見到有救護車，嗰一刻我有少少驚，怕一陣真係會中暑等人救⋯⋯不過沿途有好多人，未試過有咁多人一齊行，除咗香港人仲有勁多外國同中國遊客，又有小朋友，我估應該唔太難行嘅。我哋沿住梧桐寨石澗徑上山，雖然好辛苦，但感覺同平時好唔一樣，因為好似多咗個目標咁，知道辛苦完就睇到瀑布。由底瀑、中瀑、主瀑到散髮瀑，每行一段就有一個新嘅目標，成段旅程就變得輕鬆好多，起碼心理上輕鬆d！其實上底瀑、中瀑同主瀑都唔算好難，係石級比較多，但每行一段就停低抖吓睇瀑布，所以都唔會好攰。不過近住瀑布嘅路段會比較跣腳，因為d人落完水又行黎行去整濕晒，所以都要小心d。由主瀑上散髮瀑係最險峻嘅一段，一開始都有少少梯級嘅，但中段有亂石堆，有梯級嘅路段又窄又近住崖邊，所以行嘅時候要好小心。最後因為開始天黑，又唔知繼續行要行幾耐，同d路會唔會好危險，所以我哋睇完散髮瀑就沿路折返喇。

今個旅程好開心啊，第一次睇瀑布，原來係咁靚㗎！我覺得最靚係散髮瀑，雖然比較短，但因為上頂嘅路段比較危險，所以無乜人上，可以靜靜地抖吓。雖然好想落水玩，但龜寶再三叮囑唔可以落水，危險喔，所以都係洗吓手涼吓就算喇。

梧桐寨 > 萬德苑 > 井底瀑 > 中瀑 > 主瀑 > 散髮瀑 > 梧桐寨 

（長度約6公里，需時約4.5小時）

交通：(起點) 由大埔墟火車站搭巴士64K去梧桐寨、

(終點)巴士64K往大埔火車站

難度：★ ★ ★ ☆ ☆     上散髮瀑比較崎嶇之外，都唔算好難

風景：★ ★ ★ ★ ☆     瀑布係主角，香港唔係度度都有咁靚嘅瀑布！