【征服九龍最高山】九龍・飛鵝山

飛鵝山位於九龍東北部，高海拔603米，係九龍區最高嘅山。喺山頂可以俯覽東九龍全景、西貢白沙灣同九龍群山連綿嘅山脈。

今日趁好天我同Annie同Indy去飛鵝山「練習」喇，雖然訓練強度超低，有排都追唔上毅行嘅十分一，但要有靚景先有動力行㗎嘛，係咪？上飛鵝山有幾條路線選擇，我估我哋應該揀咗最簡單嗰條路。我哋由彩虹地鐵站行上去，沿清水灣道接上飛鵝山道，沿途環境都好舒服，唔似城市咁侷促，但未到起點我已經行到喘晒氣。雖然我哋一早計劃由百花林附近嘅山徑上山，沿途又有問人，亦都開住電話嘅導航，但就係搵唔到上山條路，唯有沿住飛鵝山道繼續行至觀景台，再沿住東山象山行去飛鵝山。一開始部分路徑略為陡峭，有時候需要手腳並用，但後來路徑都係梯級，唔算難行。我哋喺飛鵝山停機坪休息咗好耐，山上嘅風景好遼闊好靚，我同Annie就坐喺停機坪慢慢欣賞呢個靚景同嘆咗個啫喱杯！休息夠之後，我哋沿住西邊嘅山路落山，雖然呢條路已經係比較容易，但始終唔係樓梯級，而且比較窄又斜，落嘅時候都要好小心。

沿途Indy叫我哋幫佢影相，但你知啦，我哋兩個嘅影相技能都⋯⋯途中仲見到個「牽引你的大型狗隻」嘅牌，Annie即刻捉住我影相，即係點？不過今次係開心嘅，有講有笑有啫喱食。

我都唔知道要「練習」幾多次先可以去到毅行嘅水平⋯⋯不過係開心嘅，慢慢行，量力而為，分開幾次或者幾十次行，點都儲到100K嘅！

彩虹地鐵站 > 飛鵝山道 > 飛鵝山觀景台 > 東山 > 象山 > 飛鵝山 > 札山道 > 彩虹地鐵站（長度約11.5公里，需時約5小時）

難度：★ ★ ★ ☆ ☆     上山路程輕鬆但長，落山比較斜要小心

風景：★ ★ ★ ☆ ☆     360度嘅風景好靚，天氣又好

【夜晚行經馬騮竇】九龍・筆架山

筆架山位於九龍，舊名煙墩山，高海拔457米，屬於獅子山郊野公園範圍。因為山峰嘅形狀同以前放毛筆嘅筆架好相似，因而得名。

隔咗一個星期又係時間練習喇，今次行返毅行路線嘅一部分，都算係差唔多級數嘅。今晚我哋要夜探筆架山，仲有馬騮地盤！因為Annie話咁近行都行得到啦，所以我哋無搭車，直接由學校出發行上獅子山公園。我哋沿住獅子山公園旁邊嘅梯級向上行，沿路都係密密麻麻嘅梯級，有少少吃力。一直行就會到香港回歸紀念亭，獅子山同筆架山嘅交界，右轉上獅子山，左轉上筆架山，今次無分錯左右行錯喇。沿住麥理浩徑第五段上筆架山，呢段路相對地比較輕鬆，上到山頂發現除咗個大波波地標比較吸引之外，睇唔到靚景，黑蚊蚊乜都睇唔到，反而前少少有個觀景台就真睇到靚景喇～

上完山當然係落山啦，Indy話尾段係馬騮地盤，叫我哋唔好食野，但Annie今日帶咗側肩袋囉，小心俾馬騮搶你個袋啊！其實我真係好驚，已經著咗風褸包到實一實笠埋頂帽，安安靜靜加快腳步行過就算喇。Indy仲問行唔行埋金山，仲多馬騮啊，唔洗喇唔該⋯⋯今次除咗練習之外，仲練膽！

今日發生咗一段小插曲，喺上緊香港回歸紀念亭嘅路上，喺個平台位休息緊嗰陣，Annie突然尖叫，原來佢跌咗個水樽落d石罅度，佢仲想爬落去執返囉⋯⋯但如果唔執Annie全程都會無水飲，所以最後Indy幫佢執，下次帶水袋就唔會跌喇。

聯合道 > 獅子山公園 > 筆架山 > 大埔公路

（長度約7.2公里，需時約3.5小時）

交通：(終點) 的士

難度：★ ★ ☆ ☆ ☆     一開始多樓梯，中段相對輕鬆，但後段有馬騮！

風景：★ ★ ☆ ☆ ☆     觀景台睇到有靚景，香港嘅夜景係靚嘅！

【帶爸爸上獅子山】九龍・獅子山

獅子山應該係最為人熟悉嘅山峰，高海拔495米，位於九龍同沙田之間，屬九龍群山之一。因為山峰好似隻獅子而命名，由九龍南面仰望，喺遠處都可以清楚望到。佢就好似一隻伏喺山嶺上嘅獅子，守護香港，同時亦記載住香港嘅變遷同港人嘅回憶。

今次係第一次同爸爸同嘉偉行山，主要想花多d時間陪爸爸，但佢又唔會同我打波，我又唔想陪佢睇馬，今日就試吓帶佢上山玩啦。其實上獅子山有幾條路線選擇，而今日我哋揀行主線，沿住麥理浩徑第五段行，應該係最容易嘅。我哋由黃大仙地鐵站開始，沿沙田坳道向上行，過咗法藏寺繼續行至獅子山郊野公園入口。雖然都係水泥嘅斜路，但我已經覺得好攰喇，所以抖一抖，再沿住麥理浩徑第五段以龜速向上行。雖然上山一直都係梯級，但回頭一望已經可以欣賞到九龍同飛鵝山一帶嘅景色，少少辛苦都係值得嘅。沿山徑繼續行，隨後一段路徑漸見平緩，之後遇到分岔路繼續直行，左邊嘅路可以走返落沙田坳村。行前一段又有另一條分岔路，跟指示牌指示踏上左邊嘅梯級登上獅子山。呢一段梯級又長又斜，唔夠300米嘅距離，爬升80幾米，中途我都抖咗幾次，上到去嘅時候我真係攰到趴喺度，但爸爸好似唔識攰咁，仲話我行少少都嗌攰。喺山頂我哋盡情欣賞九龍半島嘅全景，從另一個角度好好睇吓我哋熟悉嘅香港。由於時間關係，我哋無行上獅頭，急急腳落山，沿住剛遇到嘅分岔路行落沙田坳村，完成今次嘅旅程。

除咗因爲天黑要急住落山，其實係因為我哋帶唔夠電筒，我用手機閃光燈咋。爸爸話好中意行山啊，不過佢話好輕鬆就上到頂囉，下次想行d難少少嘅，ok無問題，俾我抖抖先。

黃大仙地鐵站 > 沙田坳道 > 獅子山 > 黃大仙地鐵站（長度約8.6公里）

交通：(起點) 黃大仙地鐵站B2出口、(終點)地鐵

難度：★ ★ ★ ☆ ☆     有勁多梯級，但都唔係好大級嘅

風景：★ ★ ☆ ☆ ☆     有少少霧，總算睇到日落

【夜上摩星嶺探險】香港島・摩星嶺

摩星嶺係香港島最西面嘅小山丘，高海拔260米。喺摩星嶺可以飽覽港島西嘅海景，大小島嶼都一覽無遺，而且係個觀賞日落餘暉嘅好地方。

今晚我哋要夜探摩星嶺！我哋由堅離地城地鐵站出發，原本計劃由配水庫遊樂場旁邊嘅梯級上山，但我哋搵唔到入口，唯有由域多利道嘅入口開始啦。我哋沿著域多利道往西行至港島西廢物轉運站對面，踏上左邊一條被鐵絲網包圍嘅窄樓梯，窄到只足夠一個人僅僅通過。天黑之後上山已經好恐怖喇，沿途仲有唔少狗吠聲，而且d吠聲仲愈黎愈近。當我喺度諗好彩有鐵絲網包圍嘅時候，突然發現鐵絲網穿咗個㝫， 於是我就速速逃跑！沿住呢條又窄又長嘅樓梯一直向上行，途中遇到好多分岔路，Indy曾經嘗試行崎嶇嘅路同爆林，但實在太危險喇，我哋最後都係行咗闊同明顯嘅路；而且可能呢條山徑太少人行，有d路段被草叢遮蓋住，有d梯級倒塌咗，要隔外小心 。到咗摩星嶺徑之後，左轉繼續向上行，喺不遠處嘅左邊有一條完整又寬闊嘅樓梯，指示牌指住青年旅舍同摩星嶺郊遊區嘅方向，沿住呢條路行好快就到青年旅舍。我哋繼續沿住左邊嘅樓梯去郊遊區，登頂後就到咗一堆摩星嶺炮台遺址。因為我哋入夜後先上山，而且落緊雨，又凍又餓又驚嘅情況下，我哋無搵到標高柱就落山喇。沿住走過嘅寬闊樓梯，接落摩星嶺徑一直走至域多利道，完成呢次驚險嘅旅程。

經過呢一役，我下次一定唔會夜晚先上呢d有軍事遺跡嘅地方，嚇死我⋯⋯而且下次黃昏上山話唔定可以睇到日落呢。

堅離地城地鐵站 > 域多利道 > 摩星嶺 > 域多利道

（長度約4公里，需時約5小時）

交通：(起點) 堅離地城地鐵站A出口、(終點) 乘搭小巴前往堅離地城地鐵站

難度：★ ★ ☆ ☆ ☆     一直都係樓梯，而且密密麻麻嘅，有d路徑唔明顯

風景：★ ☆ ☆ ☆ ☆     天黑又落雨，我唔敢亂行，無搵到位睇靚景 

【左右不分上大東】大嶼山・大東山

大東山位於大嶼山中部，高海拔869米，係香港第三高嘅山峰。因此上落山一趟絕對唔容易，但山上遼闊嘅景觀，令人讚嘆不絕。大東山英文名為日落山，顧名思義係觀賞日落嘅好地方，尤其入秋之後，斜陽照得遍山芒草金光閃閃，即使上山路上困難重重，必定不枉此行。

今日原本計劃同Annie、Steve同Indy上鳳凰山，點知Annie帶我們上咗大東山⋯⋯我們係為咗毅行而練習嘅，所以即使無藍天白雲，只要天氣許可，我們都繼續上山。我們由東涌乘撘巴士前往伯公坳起點，沿住左邊鳳凰徑嘅梯級逆走上大東山，其實右邊嘅梯級先係上鳳凰山條路⋯⋯梯級沿山脊起伏徐徐而上，一開始嘅梯級慢慢變成大石同細石混雜嘅碎石路同泥路，由伯公坳至大東山頂要爬升達500米，真係少d力都唔得。途中Steve發現我們行錯路，對面先係鳳凰山啊！要落山重新開始嗎？不了不了，我不行喇⋯⋯過咗段柱L015之後路徑暫轉平緩，有好多俗稱「爛頭營」嘅舊石屋分佈喺大東山同二東山之間嘅山坡上。雖然有好多人爬上石屋影相，但Annie和Steve似乎對大石比較有興趣，佢哋一口氣爬上石頂，而我就留喺原地得個睇字。之後喺近段柱L014嘅分岔路，行左邊嘅小徑登上大東山山頂，路徑明顯但頗為崎嶇同狹窄，最後終到山頂嘅標高柱。可惜今日天氣欠佳，無緣觀賞大東山嘅日落，但遍山芒草都係難得一見，成個山都係金黃色，好靚。我們為免摸黑落山，趁早沿路折返，經過漫漫長路終於返到伯公坳，完成今次嘅旅程。

今次嘅旅程一d都不唔輕鬆，我用盡力先可以上到山頂，值得開心嘅係我們做到開始之前定下嘅目標，喺日落前登頂，無諗過原來我都可以做到。失望嘅係天氣不似預期，而且仲非常大風，唔單止睇唔到日落，我哋一行四人竟然無帶任何糧食，真係饑寒交迫！下次一定要準備充足嘅糧水先上山，唔係發生意外就麻煩喇。

伯公坳 > 鳳凰徑二段 > 大東山 > 伯公坳 （長度約5.2公里）

交通：(起點) 由東涌搭巴士去伯公坳、(終點) 搭巴士去東涌

難度：★ ★ ★ ★ ☆     可能太耐無行，好多樓梯，好辛苦

風景：★ ★ ☆ ☆ ☆     如果天氣晴朗嘅話應該好靚，但今日雲太厚了